Aktakuzë ndaj dy të pandehurve për vjedhje të rëndë në Gjakovë

Prokuroria Themelore në Gjakovë ka ngritur aktakuzë ndaj dy personave për vjedhje të rëndë dhe blerje, pranim dhe fshehje të sendeve të përfituara me kryerjen e veprës penale.

Sipas aktakuzës, i pandehuri Sh.Xh., më 7 qershor në Gjakovë, saktësisht në objektin në afërsi të ngrohtores së qytetit, me qëllim të përvetësimit në mënyrë të kundërligjshme të pasurisë së huaj për vete, ia merr pasurinë e luajtshme të dëmtuarit N.K.

“Në atë mënyrë natën kritike shkon në vendin e lartcekur dhe merr 40 (dyzetë) profile te dritareve të reja të pamontuara, të cilat i dëmtuari i kishte blerë atë ditë në vlerë prej 20 mijë euro, e më pas largohet nga vendi i ngjarjes dhe të njëjtat i shet tek i pandehuri V.D., me ç’ rast të dëmtuarit i shkaktojnë dëm material në vlerë 20 mijë euro”, thuhet në njoftim.

Për të pandehurin e dytë, V.D., thuhet se atë ditë në Gjakovë, konkretisht në hekurishten e tij, blen nga i pandehuri profilet e dritareve të aluminit, për te cilat ka mundur ta dijë se janë të vjedhura, në shumën e të hollave prej 120 euro.

“Shumë kjo dukshëm joproporcionale në treg e për të cilin fakt dhe këto rrethana e nga çmimi i ulët i blerjes, i pandehuri, ka mundur ta dijë se janë përfituar me kryerjen e veprës penale të vjedhjes, me ç’ rast përfiton materialisht për vete dhe duke e fshehur sendin njëkohësisht i shkakton dëm material të dëmtuarit N.K.”, thuhet tutje në njoftim.