Alarm për të shtëna në Universitetin Villanova, studentëve u kërkohet të strehohen

Një situatë urgjente është raportuar pasditen e së enjtes në kampusin e Universitetit Villanova në Pensilvani, vetëm pak ditë para nisjes së vitit të ri akademik. Policia reagoi ndaj një raportimi për një person të armatosur aktiv në ambientet e universitetit.

Sistemi i alarmit i universitetit u kërkoi studentëve të mbyllin dhe barrikadojnë dyert dhe të strehohen në vende të sigurta, ndërsa një tjetër paralajmërim i bëri thirrje të qëndrohet larg Fakultetit të Juridikut.

Policia e Radnor Township njoftoi përmes rrjeteve sociale që studentët dhe banorët të qëndrojnë në vend. Ngjarja ndodhi gjatë orientimit për studentët e rinj. Deri tani, nuk ka raportime për të lënduar apo të arrestuar, shkruan AP, transmeton IndeksOnline.

Profesori i teologjisë dhe etikës në Villanova, Brandon Ambrosino, i cili nuk ndodhej në kampus në momentin e ngjarjes, tha se shumica e stafit akademik ende nuk kishin ardhur në universitet, ndërkohë që studentët kishin filluar të vendoseshin një ditë më parë.

“Askush nga kolegët e mi nuk e di saktësisht çfarë po ndodh. Po komunikojmë mesazhe pa ndalur,” deklaroi Ambrosino.

Policia vijon hetimet dhe monitorimin e situatës. Nuk ka ende konfirmim zyrtar për ndonjë të plagosur apo të arrestuar.