Ambasada e SHBA-së financon themelimin e Qendrës edukative “Bonevet”, në Mitrovicë
Ambasada e SHBA-së në Prishtinë është krenare të njoftojë që ka mbështetur themelimin e një qendre të re të “BONEVET”-it në Mitrovicë, me një grant prej 248.000 dollarëve amerikanë. Kjo do të jetë qendra e katërt e këtij lloji në Kosovë.
Ambasada e SHBA-së në Kosovë e ka mbështetur qendrën “BONEVET” që nga fillimi. Jemi krenarë që tani po e thellojmë partneritetin tonë me këtë organizatë shumë të suksesshme, pasi ajo po e zgjeron punën e saj për t’i zhvilluar aftësitë konkrete, teknologjike dhe kreative të nxënësve të shkollave fillore e të mesme në mbarë vendin.
“BONEVET Mitrovica”, do të jetë pasuri e shkëlqyeshme për të rinjtë e qytetit nga të gjitha komunitetet. Presim që “BONEVET Mitrovica” të marrë mbështetje të plotë lokale pasi ajo po kërkon hapësirë të vlefshme për punën e saj në Mitrovicë.
Jemi optimistë që nxënësit e “BONEVET Mitrovica” do të bëhen pjesë e rëndësishme e kapitalit njerëzor të qytetit, me aftësi konkrete teknologjike dhe me një perspektivë globale që plotësisht përqafon diversitetin dhe harmoninë që shpijnë drejt zhvillimit ekonomik dhe prosperitetit.
BONEVET është një mjedis interaktiv i mësimnxënies ku fëmijët dhe të rinjtë i zbulojnë talentet, aftësitë dhe njohuritë e tyre përmes edukimit të bazuar në teknologji. Përmes programeve të saj unike e gazmore të edukimit që nxisin kureshtjen, imagjinatën, kreativitetin dhe përvojën praktike që nga mosha e re, “BONEVET”-i i përgatit nxënësit e vet për t’i kapërcyer sfidat digjitale që po zhvillohen shumë shpejt.
