Ambasada gjermane: Keqinterpretim të thuash se ky ishte “operacioni i parë i FSK-së në veri”
Pas dy ditësh kërkimi intensiv, ekipi i specializuar i Kërkimit dhe Shpëtimit nga Forca e Sigurisë së Kosovës (FSK) ka arritur të gjejë trupin e pajetë të qytetarit Rrahim Latifi, i cili kishte kërcyer nga ura e Ujmanit më 27 korrik. Operacioni u zhvillua në koordinim me KFOR-in dhe u realizua për qëllime strikte humanitare.
Ndërhyrja e FSK-së në veri të vendit ka ngjallur komente dhe interpretime politike, me disa akterë që e quajtën këtë si “operacioni i parë i FSK-së në veri të Kosovës”.
Ambasada Gjermane në Prishtinë reagoi, duke shprehur shqetësim për politizimin e rastit dhe manipulimin e mundshëm të imazheve që injorojnë rolin e KFOR-it në operacion.
“Humbja tragjike e një jete të re duhet të na bashkojë në pikëllim, jo të përdoret për përfitime politike,” thuhet në reagimin e Ambasadës, e cila vlerësoi profesionalizmin dhe bashkëpunimin mes FSK-së dhe KFOR-it në këtë mision humanitar.
Më poshtë deklarata e Ambasadës Gjermane:
Ambasada Gjermane është thellësisht e shqetësuar nga përpjekjet për të politizuar vendosjen e sotme të një ekipi të specializuar të Kërkimit dhe Shpëtimit nga Forca e Sigurisë së Kosovës (FSK) në Liqenin e Gazivodës – një operacion i lehtësuar nga KFOR-i në përputhje të plotë me mandatin e tij dhe i miratuar nga Komandanti i KFOR-it vetëm për qëllime humanitare. Humbja tragjike e jetës së një të riu duhet të jetë një moment pikëllimi kolektiv, jo një rast për poena politik.
Deklaratat e aktorëve politikë që e paraqesin këtë mision si “operacioni i parë i FSK-së në veri të Kosovës” keqinterpretojnë qëllimin dhe frymën e vendosjes. Po aq shqetësuese janë akuzat për imazhe të manipuluara – konkretisht, heqja e elementëve të dukshëm të shoqërimit të KFOR-it – për të promovuar një narrativë mashtruese. Veprime të tilla rrezikojnë të minojnë besimin e publikut dhe të shkëpusin vëmendjen nga fokusi humanitar i misionit.
Ambasada Gjermane përsërit mbështetjen e saj të plotë për KFOR-in dhe mandatin e tij, dhe shpreh mirënjohje të sinqertë për të gjithë personelin e KFOR-it dhe FSK-së të përfshirë në përpjekjet e sotme të rimëkëmbjes. Profesionalizmi dhe bashkëpunimi i tyre i shërbejnë të mirës publike dhe shërbejnë si një kujtesë për atë që mund të arrihet kur institucionet punojnë së bashku në shërbim të dinjitetit njerëzor.
