Amerikanët presin në radhë për t’i mbushur shishet me ujë

Miliona banorë të Teksasit në Shtetet e Bashkuara po përballen me mungesë të ujit të pijshëm pasi temperaturat e ulëta bënë që gypat e ujësjellësit të shpërthejnë.

Zyrtarët në Teksas urdhëruan shtatë milionë njerëz apo çerekun e popullsisë së shtetit të dytë më të madh të ShBA-së për numër të banorëve që ta vlojnë ujin e ujësjellësit para se ta pijnë, pasi ditët e ftohta i ngrinë gypat dhe e dëmtuan infrastrukturën e ujësjellësit.

Pengesat në furnizimin me ujë erdhën pasi miliona amerikanë u përballën edhe me ndërprerje masive të energjisë elektrike, shkruan The Guardian.

Nga ndërprerja e ujit janë prekur edhe spitalet në Austin dhe Houston. “Po punojmë më zinxhirin tonë furnizues që të ofrojmë ujë për pacientët, stafin dhe operatorët tanë”, tha David Huffstutler nga sektori i shëndetësisë në Austin.

Shtypja e ujit ka rënë në tërë shtetin, sepse gypat e rrjetit janë ngrirë dhe shumë banorë po i lënë çezmat të hapura me shpresë që ta parandalojnë ngrirjen e gypave, tha Toby Baker, drejtor ekzekutiv i Komisionit për Cilësinë e Mjedisit në Teksas.

Sistemi i furnizimit me ujë ka pasur probleme edhe në disa qytete tjera jugore, përfshirë Louisianan, Shreveportin dhe New Orleansin.

Një përdoruese e rrjeteve sociale ka publikuar fotografi të rafteve të një dyqani, ku shihet se nuk ka shishe me ujë, ndërsa kanë mbetur edhe pak prodhime të tjera ushqimore.

The shelves at Natural Grocers in Austin. There’s basically no water, and canned food is going quickly. But people are still lining up outside the door, waiting in a fresh snowfall to nab what they can before it’s gone. pic.twitter.com/ugFlq4PG3p

— Alexandra Villarreal (@allyevillarreal) February 18, 2021