Andrews: Procesi i vettingut, mund të përballet me sfida dhe rreziqe

Zëvendësndihmëssekretari i Departamentit të Shtetit, Jorgan K. Andrews, deklaroi sot se Kosova nuk do të ketë asistencë të përhershme nga Shtetet e Bashkuara të Amerikës, duke porositur se varet nga vullneti politik, por edhe nga qytetarët e Kosovës se sa do të ketë sundim të ligjit në vend.

Ai këto komente i bëri gjatë një sesioni të diskutimit të organizuar nga Instituti i Kosovës për Drejtësi (IKD) në bashkëpunim me Ambasadën amerikane në Prishtinë, ku ka folur për rolin e shoqërisë civile në sistemin e drejtësisë.

Andrewsi, i cili vjen për herë të parë në Kosovë, tha se qytetarët e vendit duhet të jenë të kenë besim në institucionet vendore, por e rëndësishme është që të ndërtohet ky besim.

“Puna jonë me institucionet qeveritare është që të krijohet ky besim. Roli të cilën e luan shoqëria civile është krucial. Nuk ka një sistem të përkryer të drejtësisë. As te ne nuk është i përkryer. Institucionet ngrihen dhe përmirësohen duke u munduar që të jetë i përkryer. Roli i shoqërisë civile nganjëherë mund të jetë konfrontues. Kur Kosova të ngritë kapacitetet e veta, asistenca nuk është e përhershme dhe nevoja për këtë asistencë largohet”, tha ai.

Ai mes tjerash tha se nga vullneti politik varet sundimi i ligjit në vend.

“Mosndëshkimi ndikon në sundimin e ligjit, mosndëshkimi është masë e mossundimit të ligjit. Një nga proceset më të rëndësishme është që të mbajmë me llogari ata që janë në fuqi, edhe sistemi i drejtësisë duhet të mbrojë më të dobëtit”, ka shtuar ai.

Gjatë diskutimit ai ka theksuar se ka sfida dhe rreziqe të mëdha në procesin e vettingut.    

“Ka qasje më të mirë të përmirësimit se sa të bëhet vettingu, sepse numri i tyre mund të përgjysmohet dhe numri i gjyqtarëve dhe prokurorëve mund të ulet. Ka rreziqe dhe sfida të mëdha në këtë proces”, ka porositur Andrewsi.