AP: BE-ja do t’u bëjë presion Kurtit e Vuçiqit që ta lënë prapa armiqësinë dekadëshe

Bashkimi Evropian do të rrisë presionin ndaj Kosovës dhe Serbisë për të normalizuar marrëdhëniet e tyre duke angazhuar liderët e tre vendeve anëtare të peshave të rënda dhe zyrtarët e lartë për të bërë një shtytje të madhe për t’i detyruar ish-armiqtë e luftës të lënë mënjanë mosmarrëveshjet e dekadave.

Kryeministri Albin Kurti dhe presidenti i Serbisë Aleksandar Vuçiq nuk kanë besim tek njëri-tjetri dhe nuk ka gjasa të takohen ballë për ballë. Por ata do të zhvillojnë bisedime veçmas me krerët e Francës, Gjermanisë dhe Italisë, plus dy zyrtarët e BE-së që mbikëqyrin një “dialog” belbëzues mes tyre, raporton AP.

Takimet në Bruksel vijnë në margjinat e një samiti të BE-së. Ka frikë të madhe për një rifillim të dhunës që karakterizoi lidhjet e tyre gjatë një lufte të viteve 1998-99 dhe që kur Kosova u shkëput nga Serbia në vitin 2008.

Si Kosova ashtu edhe Serbia duan të anëtarësohen në BE, por ata janë paralajmëruar se duhet të zgjidhin dallimet e tyre së pari.

Evropianët janë nxitur të veprojnë pas agresionit të Serbisë ndaj Kosovës më 24 shtator, kur rreth 30 persona të armatosur serbë kaluan në veri të Kosovës, vranë një oficer policie dhe ngritën barrikada. Tre persona të armatosur u vranë në shkëmbimin e zjarrit me policinë e Kosovës.

Bisedimet e së enjtes synojnë të vënë në veprim një marrëveshje që Kurti dhe Vuçiqi arritën në shkurt, megjithëse të dy kanë ngritur çështje në lidhje me atë marrëveshje që atëherë. Ideja është që të punohet mbi “propozimet dhe idetë” e reja të paraqitura në bisedimet eksploruese fundjavën e kaluar, tha Peter Stano, zëdhënës i shefit të politikës së jashtme të BE-së, Josep Borrell, i cili mbikëqyr Dialogun Prishtinë-Beograd.

Problemi i madh është se as Kurti e as Vuçiqi nuk duan të jenë të parët që bëjnë lëshime pa garanci se tjetri do të veprojë.

BE-ja dhe ShBA-ja po i bëjnë presion Kosovës që të lejojë krijimin e një Asociacioni të Komunave me Shumicë Serbe për të koordinuar punën për arsimin, kujdesin shëndetësor, planifikimin hapësinor dhe zhvillimin ekonomik në komunitetet e Kosovës veriore të populluara kryesisht nga serbët etnikë.

Kurti ka frikë se një asociacion i tillë do të ishte një hap drejt krijimit të një mini-shteti serb me autonomi të gjerë.

Gjëja e fundit që duan evropianët është më shumë konflikt në oborrin e shtëpisë së tyre. Lufta ndërmjet Kosovës dhe Serbisë la më shumë se 10,000 të vdekur, kryesisht shqiptarë të Kosovës.