Ardian Gjini i dërgon propozim Nagavcit për orët e humbura për nxënësit: Pesë orë shtesë në javë, jo vikendit!

Kryetari i Gjakovës dhe nënkryetari i AAK-së, Ardian Gjini i ka dorëzuar një propozim ministres Nagavci për kompenzimin e orëve të humbura për nxënësit në shkolla.

Gjini ka propozuar që orët duhet kompenzuar gjatë ditëve të punës, pesë orë shtesë në javë për çdo klasë dhe nxënës deri në kompensimin e plotë. Gjini ka thënë se nuk ka logjikë që orët e humbura të kompenzohen gjatë fundjavës apo në ditët e pushimit.

“ORËT E HUMBURA TË MËSIMIT DUHET TË KOMPENSOHEN GJATË DITËVE TË PUNËS JO NË FUNDJAVË DHE GJATË DITËVE TË PUSHIMIT
Ministria e Arsimit duhet ta ndryshojë vendimin për kompensimim e orëve të punës të humbura gjatë grevës.
Orët e punës duhet të kompenzohen, por jo gjatë fundjavës dhe ditëve të pushimit.
Fillimisht, fëmijët do të stërlodhen. Edhe familjet e tyre.
Së dyti, për shkak të pasigurisë që na pret si pasojë e krizës energjetike, shpenzimi i energjisë do të jetë shumë më i lartë dhe me rrezik të pamundësisë për t’i ngrohur shkollat.
Edhe bartja e nxënësve, që është obligim ligjor i yni, do të jetë më e vështirë për shkak të çmimit të karburantit.
Prandaj orët duhet kompenzuar gjatë ditëve të punës, pesë orë shtesë në javë për çdo klasë dhe nxënës deri në kompensimin e plotë.
Për këtë, dje ia kam dërguar një letër ministres së arsimit dhe nuk kam marrur përgjegje” shkruan Gjini./Indeksonline/