Arrestohen pesë persona për lëndim të rëndë trupor në Shtime, dy veta përfundojnë në QKUK

Pesë persona janë arrestuar pas një përleshje fizike që ka ndodhur në rrugën ‘Skënder Salhiu’ në Shitime.

Sipas policisë gjatë përleshjes janë përdorur edhe mjetet e forta dhe një thikë, raporton IndeksOnline.

Si pasojë, dy persona kanë pësuar lëndime të rënda trupore dhe janë dërguar për trajtim mjekësor në Qendrën Klinike Universitare të Kosovës në Prishtinë.

“Hetuesit rajonalë nga Sektori i Hetimeve Rajonale në bashkëpunim me njësitet policore në Shtime, të autorizuar nga prokurori kujdestar, më 21.06.2025 kanë ndërmarrë veprime hetimore dhe rreth orës 22:40 kanë arrestuar pesë persona të dyshuar: A. M. (19 vjeç), Sh. R. (19 vjeç), E. S. (18 vjeç), A. M. (17 vjeç) dhe L. M. (17 vjeç).

Sipas hetimeve paraprake, mes palëve kishte pasur konflikte të mëhershme, ndërsa përleshja ka ndodhur pas një fjalosjeje gjatë lëvizjes me veturë në të njëjtën rrugë.

Tre të dyshuar (A. M., Sh. R. dhe E. S.) janë ndaluar për 48 orë me vendim të prokurorit, ndërsa dy të miturit janë liruar në procedurë të rregullt”, thuhet në njoftim.

Rasti është duke u trajtuar nga hetuesit rajonalë dhe për çdo zhvillim tjetër do të jeni të informuar me kohë. /IndeksOnline/