Arrestohet një person në Prishtinë për drogë dhe armë, i gjendet edhe një mjet shpërthyes

Pas një pune operative-hetimore, Policia e Kosovës ka arrestuar një person në rrugën “Jakov Xoxa” Prishtinë nën dyshimin për posedim dhe shitblerje të substancave narkotike si dhe për armëmbajtje pa leje.

Gjatë kontrollit fillestar, tek i dyshuari një mashkull kosovar policia ka gjetur dhe sekuestruar një pistoletë me 11 fishekë, një telefon mobil dhe 140 euro.

Në konsultim me prokurorin e shtetit, janë kontrolluar dy banesa dhe disa podrume që ishin në shfrytëzim nga i dyshuari, ku janë zbuluar edhe sasi të tjera të konsiderueshme të armëve dhe narkotikëve.

Sipas Policisë, gjatë kontrolleve janë sekuestruar:

• 17.08 gramë substancë e dyshuar narkotike e llojit kokainë,
• një mjet shpërthyes (bombë),
• një armë automatike AK-47,
• një pistoletë tjetër,
• 20 fishekë,
• një peshore digjitale për matjen e narkotikëve,
• si dhe një DVR i kamerave të sigurisë.

Pas përfundimit të veprimeve të para hetimore, me vendim të prokurorit i dyshuari është dërguar në mbajtje, ndërsa rasti po hetohet për posedim dhe shitblerje të substancave narkotike dhe armëmbajtje pa leje./IndeksOnline/