Arsenal distancohet nga komentet e Ozil rreth persekutimit të muslimanëve në Kinë

Arsenali është distancuar nga komentet e bëra nga Mesut Ozil në Instagram, ku ai foli ashpër kundër persekutimit të Kinës ndaj popullsisë ujguriane në rajonin veriperëndimor të Xinjiang dhe kritikoi muslimanët që nuk kanë bërë më shumë për të theksuar çështjen.

Klubi u përpoq të kufizojë çdo dëmtim të mundshëm në biznesin e tyre në Kinë, ku ka interesa të shumta tregtare përfshirë një zinxhir restorantesh, duke lëshuar një deklaratë në ëeibo – një vend kryesor kinez i mediave sociale – si dhe platforma të tjera ku theksojnë se klubi është apolitik dhe nuk e lidh veten me pikëpamjet e Ozil, transmeton IndeksOnline.

“Sa i përket komenteve të bëra nga Mesut Ozil në mediat sociale, Arsenali duhet të bëjë një deklaratë të qartë,” lexohet në të. “Përmbajtja e publikuar është mendimi personal i Ozil. Si një klub futbolli, Arsenali gjithmonë ka respektuar parimin e mos përfshirjes së tij në politikë. “

Ozil e kishte shtuar zërin e tij në valën e zemërimit ndërkombëtar në lidhje me trajtimin e muslimanëve ujgurë, një pakicë myslimane që flet turqisht, të cilët i janë nënshtruar një fushate të përndjekjes fetare dhe etnike nga autoritetet kineze.

Rreth 10 milionë ujgurë jetojnë në Xinjiang dhe ka pretendime se më shumë se një milion janë mbajtur në kampe paraburgimi gjatë viteve të fundit. Postimi i Ozil kishte renditur një sërë çështjesh me të cilat përballen ujgurët në Kinë, duke akuzuar muslimanë të tjerë se heshtnin për këtë temë.

Mesazhi i tij në Instagram shkruan: “Turkistani Lindor, plaga e përgjakur e Umetit, duke rezistuar kundër persekutuesve duke u përpjekur t’i ndajnë ata nga feja e tyre. Ata djegin Kuranet e tyre. Ata mbyllën xhamitë e tyre. Ata ndalojnë shkollat ​​e tyre. Ata vrasin njerëzit e tyre të shenjtë. Burrat janë detyruar të futen në kampe dhe familjet e tyre detyrohen të jetojnë me burra kinezë. Gratë detyrohen të martohen me burra kinezë.

“Por muslimanët heshtin. Ata nuk do të bëjnë zhurmë. I kanë braktisur. A nuk e dinë ata se dhënia e pëlqimit për përndjekje është vetë përndjekje? ” ka shkruar Ozil. /IndeksOnline/