18:17 / E Hënë, 16 Shtator 2019

Asnjë përparim në takimin Juncker-Johnson për Brexit

Një takim mes presidentit të Komisionit Evropian, Jean-Claude Juncker dhe kryeministrit të Britanisë së Madhe, Boris Johnson, ka përfunduar pa përparime të qarta, njoftoi Bashkimi Evropian.

”Juncker i tha Johnsonit se është përgjegjësia e Britanisë së Madhe të gjejë zgjidhje ligjore funksionale që janë në përputhje me marrëveshjen e tërheqjes nga BE”, tha komisioni.

“Presidenti Juncker theksoi gatishmërinë e vazhdueshme të komisionit dhe sinqeritetin për të kontrolluar nëse këto propozime i përmbushin objektivat e vëna. Propozime të tilla ende nuk janë bërë”, shton deklarata.

Takimi i drekës u përshkrua si një shans për të vlerësuar bisedimet në vazhdim, në një nivel të lartë dhe për të diskutuar hapat e ardhshëm, duke vënë në dukje se samiti i BE-së në tetor do të jetë një moment i rëndësishëm historik.

”Të 27 vendet e mbetura anëtare të BE-së, mbeten të bashkuara”, thuhet në deklaratë.