Astronauti rus dëbohet nga programi i SpaceX, dyshohet për spiunazh

Roscosmos njoftoi se Oleg Artemyev është tërhequr nga misioni Crew-12, pasi dyshohet se gjatë stërvitjeve në qendrën e trajnimit të SpaceX në Hawthorne, Kaliforni, ka fotografuar materiale të ndjeshme dhe klasifikuara të kompanisë.

Sipas raporteve, 54-vjeçari, kozmonaut veteran me tri misione në Stacionin Hapësinor Ndërkombëtar (ISS) – fotografoi dokumentacion, motorë dhe pajisje të brendshme të SpaceX, dhe pastaj u përpoq t’i nxirrte nga baza me telefonin personal, çka përbën shkelje të rregullave amerikane që ndalojnë eksportin e teknologjisë së ndjeshme jashtë SHBA‑së.

Në vend të tij, në ekuipazhin e Crew‑12 u caktua Andrey Fedyaev – kozmonaut që më parë kishte fluturuar me misionin Crew‑6 në 2023‑n, raporton euronews.

Zyrtarisht, Roscosmos tha se ndërrimi u bë “për shkak të transferimit në një punë tjetër”, pa përmendur hetimin.

Misioni Crew‑12 është planifikuar të nisë më 15 shkurt 2026, por largimi i Artemyevit vetëm disa muaj para nisjes ka nxitur spekulime të shumta mbi sigurinë dhe bashkëpunimin rus‑amerikan në hapësirë.