Australi, muslimanët rinisin namazin e xhumasë në xhami pas 8 muajsh

Namazi i fundit i xhumasë u fal më 13 mars në xhami pasi namazi me xhemat nuk lejohej për shkak të pandemisë së koronavirusit të ri (COVID-19).

Myslimanët në Australi të premten rinisën namazin me xhemat në xhami, hera e parë që nga marsi.

Namazi me xhemat u krye, duke respektuar masat e distancës sociale në xhaminë -Meadow Heights, në Melburn.

Namazi i fundit i xhumasë u fal më 13 mars në xhami. Namazi me xhemat deri tani nuk u lejua për shkak të pandemisë së koronavirusit të ri (COVID-19) në vend. Meadow Heights-i është një nga zonat më të populluara të Melburnit.

Namazet faleshin në grupe me 50 persona dhe drejtoheshin nga të paktën pesë imamë të ndryshëm.

Besimtarët mbanin me vete sexhade dhe kryenin lutje duke ruajtur distancën fizike midis tyre.

Kjo ishte hera e parë në historinë e Australisë që xhamitë u mbyllën në mars.

“Është e paprecedentë, nuk është diçka që është dashur të bëhet më parë. Por mendoj se po jetojmë në kohëra që kërkohet kjo domosdoshmërisht”, ka deklaruar për SBS News-in imami Yahya Adel Ibrahim i Xhamisë Al Rahman në periferinë jugore të Perthit.

Ndërkohë, kryeministri i Australisë, Scott Morrison, njoftoi të premten se do të lejojë udhëtimet midis të gjitha rajoneve të vendit përveç Australisë Perëndimore deri në Krishtlindje.

Ai tha se Kabineti kombëtar i Australisë gjithashtu kishte “rënë dakord për masat e shëndetit publik për të siguruar që shtetet dhe territoret të mbeten të hapura më 2021”, raportoi ABC News.

Megjithatë, Australia Perëndimore do të vazhdojë disa nga masat deri në vitin 2021, ndërsa udhëtarëve nga Uellsi i Ri Jugor dhe Victoria u kërkohet të hyjnë në karantinë pas mbërritjes.

Australia ka raportuar rreth 27 mijë raste të koronavirusit që nga shpërthimi, duke pasur 907 vdekje.