AUV në aksion të 17 mishtoreve/ Konfiskon 300 kilogramë mish në Pejë

Agjencia e Ushqimit dhe Veterinarisë përmes Inspektoratit Veterinar sot ka organizuar një aksion kontrolli në të gjitha mishtoret e qytetit të Pejës.

Ky aksion është zhvilluar për të kontrolluar shitjen e mishit dhe nënprodukteve të mishit në aspektin e plotësimit të kritereve ligjore për tregtim të sigurt të kësaj kategorie të produkteve, shkruan Indeksonline.

Për këtë aksion, ka folur zëdhënësi i AUV Lamir Thaqi.

Ai për Indeksonline ka thënë se nga inspektimet e ushtruar në 17 mishtore, ka rezultuar me largim nga shitja- konfiskim të një sasie prej rreth 300 kg mish dhe nënprodukte mishi që nuk i plotësonin kriteret ligjore për tregtim.

“Në disa nga mishtoret në qytetin e Pejës është gjetur mish i pa vulosur që nënkupton se nuk është therur kafsha në thertore të licencuar. Në disa raste janë hasur duke u shitur nënprodukte mishi të trajtuara termikisht suxhuk mish i terur në subjekte të cilat nuk janë të licencuara për përpunim”, ka thënë Thaqi.

Sasitë e gjetura nëpër mishtore pa dokumentacion, sipas tij janë ndaluar për qarkullim nga inspektoret, të njëjtat do të asgjësohen në ditët në vijim në prezencë të inspektorit kompetent.

Aksione të tilla AUV ka ndërmarrë ditë më parë në qytetin e Prizrenit dhe në Ferizaj./IndeksOnline