14:29 / E Hënë, 13 Korrik 2020

Balaj-Halimaj, kërkon nga Qeveria shqiptare pezullimin e takës në rrugën e kombit deri më 15 shtator

Zv.kryeministrja e Kosovës, Albulena Balaj- Halimaj, ka takuar në Tiranë zv-kryeministrin e Shqipërisë, Erion Braçe.

Në këtë takim u diskutua për përgatitjet për mbajtjen e mbledhjes së dy qeverive që pritet të mbahet muajin shtator në Shkodër, e ku pritet të nënshkruhen disa marrëveshje të reja midis dy qeverive.

Zv-kryeministrja Balaj- Halimaj kërkoi nga Qeveria shqiptare që të shikojë mundësitë për pezullimin e taksës në rrugën e kombit për qytetarët e Kosovës, për së paku dy muaj, deri më 15 shtator.

Po ashtu, ajo ka kërkuar që të eleminohen të gjitha pengesat që po pamundësojnë realizimin e marrëveshjeve të arritura më herët; siç është funksionalizimi i plotë i pikës doganore në Durrës, unifikimi i kodit doganor, njohja e dokumentacioneve recioproke për export dhe import, si dhe kërkesën e Odës së Farmacistëve të Kosovës për listën e çmimit të barnave.

Zv.kryeministri Braçe u zotua se kërkesën për pezullimin e taksës do ta ngrisë në mbledhjen e ardhshme të Qeverisë së Shqipërisë, që pritet të mbahet këtë javë. Po ashtu, ai shprehu angazhimin e tij dhe vullnetin në realizimin e plotë të të gjitha marrëveshjeve të arritura midis dy vendeve tona.

Zv.kryeministrja Balaj-Halimaj tha se gjithë përkushtimi i saj do të jetë në funksion të zbatimit të marrëveshjeve të arritura më herët dhe marrëveshjeve të reja që mund të arrihen në shtator e që për qëllim do të kenë lehtesimin e jetesës së qytetarëve andëj e këndej kufirit.

Temë e këtij takimi ishte edhe menaxhimi i pandemisë COVID-19 në dy vendet tona.

Mos i humb