Bayern nuk e dëshiroi, Milan hap rrugën drejt transferimit të sulmuesit danez

Bayern Munich ka hedhur poshtë mundësinë për të transferuar sulmuesin e Manchester United, Rasmus Højlund, duke i hapur kështu rrugën Milanit për të qenë favorit në garën për firmën e tij.

Sipas raportimeve nga Sky Sport dhe të përcjella nga IlMilanista, klubi bavarez nuk ka interes për 21-vjeçarin danez, pavarësisht se ai iu është ofruar gjatë këtij merkatoje. Bayern konsideron se repartin ofensiv e ka të kompletuar dhe nuk e sheh të nevojshme afrimin e një tjetër qendërsulmuesi.

Ky zhvillim i fundit duket se e forcon pozicionin e Milanit, i cili është në kërkim të një sulmuesi të ri pas largimeve dhe ndryshimeve në repartin e avancuar. Fillimisht, raportohej se Højlund nuk ishte i interesuar të bashkohej me Rossonerët, por sipas burimeve të fundit, lojtari ka ndryshuar qëndrim dhe është i hapur për një transferim në San Siro.

Milan synon të realizojë një marrëveshje në formën e huazimit me të drejtë blerjeje, ndërsa vetë Højlund thuhet se preferon një largim përfundimtar nga “Old Trafford” nëse vendos të mbyllë aventurën në Premier League.

Megjithatë, një qëndrim i mundshëm në Manchester nuk përjashtohet plotësisht, sidomos pas afrimit të sulmuesit të ri nga Leipzig, Benjamin Šeško, i cili pritet të rrisë konkurrencën për një vend titullari te “Djajtë e Kuq”.

Højlund, i cili u transferua te United nga Atalanta verën e kaluar për rreth 75 milionë euro, shënoi 16 gola në sezonin e tij të parë në Angli, por nuk ka arritur të bindë plotësisht drejtuesit e klubit.

Nëse Milan arrin ta mbyllë marrëveshjen, kjo do të shënonte rikthimin e danezit në Serie A, ku ai ka treguar më parë formë të shkëlqyer me Atalantën.