Beyonce shënon histori, fiton Emmy-n e parë për “Beyoncé Bowl”

Beyoncé Knowles-Carter ka fituar çmimin e saj të parë Emmy, falë performancës spektakolare gjatë ndeshjes së NFL për Krishtlindje në Netflix, mes Baltimore Ravens dhe Houston Texans.

E titulluar “Beyoncé Bowl”, performanca me tematikë western në qytetin e saj të lindjes, Houston, shënoi debutimin live të këngëve nga albumi i saj i fundit “Cowboy Carter”.

Artistja ishte pjesë e një ekipi prej gjashtë personash që u vlerësuan me çmimin për kostumet më të mira në një shfaqje, dokumentar apo reality, një kategori që shpërblehet përmes një procesi të veçantë jurie dhe jo përmes votimit tradicional.

Ky çmim shënon një tjetër sukses për këngëtaren me 35 çmime Grammy, duke e çuar drejt “EGOT” – një nga arritjet më të rralla në industrinë e argëtimit, që përfshin fitimin e një Emmy, Grammy, Oscar dhe Tony.

Përveç fitores, Beyoncé është gjithashtu e nominuar për “Specialin më të mirë varieté” si producente e “Beyoncé Bowl” dhe për regjinë më të mirë në një shfaqje varieté. Ndërkohë, Jay-Z, po konkurron në të njëjtën kategori si producent ekzekutiv i performancës së Kendrick Lamar në Super Bowl.