20:40 / E Mërkurë, 09 Tetor 2019

Bislimi: E rëndësishme që gjithkush nga ne të dëshmojmë se gjuha përçarëse i takon së kaluarës

Nënkryetari i Lëvizjes Vetëvendosje, Besnik Bislimi, ka thënë se pas fitores së këtij subjekti politik në zgjedhjet e 6 tetorit, qytetarët kanë pritje të mëdha për qeverinë e re.

Bislimi tha se pritjet e qytetarëve janë të mëdha si nga ata të vendit, por edhe nga miqtë e regjionit e më larg, të cilët presin që qeveria er e të prezantojë një qasje komplet ndryshe si ndaj  buxhetit ashtu edhe ndaj aseteve ndërmarrjeve publike, si ndaj nxënësve e ndaj pensionistëve, punëtorëve por edhe ndërmarrësve, pa dallim etnie.

Por para se gjithash Bislimi tha se duhet pasur një qasje bashkëpunuse edhe ndaj opozitës, transmeton Indeksonline.

Nënkryetar i Vetëvendosjes ka reaguar gjithashtu pasi bashkëpartiaku i tij, Sali Zyba, përmes një statusi në Facebook, menjëherë pas zgjedhjeve, e kërcënoi Shpend Ahmetin, se nën pushtetin e VV-së do ta heqin nga kreu i Prishtinës dhe se i duhet të zgjedh vendin ku të ikë. Bislimi tha se gjuha përçmuese e përçarëse që ka qenë e zakonshme në komunikin  ish-pozitës me ta, përfundimisht i takon së kaluarës.

Positmi i plotë:

Të nderuar aktivistë, vullnetarë e mbështetës të Lëvizjes Vetëvendosje, të nderuar qytetarë të Kosovës,

Fillimisht urime secilit prej jush për fitoren e madhe të 6 tetorit. Dhe faleminderit për mbështetjen e parezervë të manifestuar edhe përmes daljes masive në vendvotime. Me 6 tetor e përmbyllëm një fushatë shumë intenzive, shumë të pastërt dhe afirmative nga ana e Lëvizjes Vetëvendosje, por edhe nga subjektet tjera pjesëmarrëse ne zgjedhje.

Fitorja është e madhe për arsye se edhe pritjet e qytetarëve nga qeverisja e re janë shumë të mëdha. Si qytetarët e vendit ashtu edhe miqtë tanë nga regjioni e më larg, me të drejtë presin që qeveria e re të prezantojë një qasje komplet ndryshe si ndaj buxhetit të shtetit ashtu edhe ndaj aseteve e ndërmarrjeve publike; si ndaj nxënësve ashtu edhe pensionistëve; si ndaj punëtorëve ashtu edhe ndërmarrësve; si ndaj gruas ashtu edhe të rinjve; si ndaj qytetarëve këtu (pa dallim etnie) ashtu edhe mërgatës. Një qasje bashkëpunuese ndaj opozitës. E parasëgjithash një fjalor në komunikim që reflekton respekt ndaj secilit e për secilin.

Dhe kanë të drejtë në këto pritje. Është tejet e rëndësishme që secili prej nesh, pamarrë parasysh deputet apo asambleist, aktivist apo mbështetës, të dëshmojmë secilen ditë të lume që këto pritje do të përmbushen. Që gjuha përçmuese e përçarëse që ka qenë e zakonshme në komunikimin e ish pozitës me ne, përfundimisht i takon së kaluarës. Që secili qytetar i vendit të ketë arsye të ndihet rehat nën qeverisjen tonë.

Vetëm kështu tregojmë se e meritojmë besimin që na është dhënë më 6 tetor.