Bislimi kritikon Hotin, thotë se s’ka tru për rimëkëmbje ekonomike – ka disa fjalë edhe për Shpend Ahmetin

Ish-ministri i Financave, Besnik Bislimi beson se kryeministri i Kosovës, Avdullah Hoti nuk ka interes që ta kaloj Ligjin për Rimëkëmbje Ekonomike.  
Bislimi për KP, sqaron edhe idenë e tij se cila do të ishte rimëkëmbja e duhur ekonomike që do rriste kërkesën agregate në vend.

“Ligji, veç rimëkëmbje nuk është, a buxheti e ka rimëkëmbjen brenda. Do të thotë Avdullah Hoti i ka të gjitha mekanizmat, të gjitha mundësitë, veç nuk e ka trurin. Projektligji për rimëkëmbje nuk ia jep atë. Avdullah Hoti, bindja ime e fortë është, se e dinë që ky projektligj është zero dhe ai nuk ka interes ta kalojë. Në atë moment që ligji do të kalojë qytetarët do të kuptonin që nuk ka substancë dhe s’ka njerëz prapa që munden me shty përpara”, thotë Bislimi.

 Ai thotë se ideja e tyre për marrjen e një kredie prej 900 euro të qytetarëve do të ishte e duhura, pasi kthimi, pa kamatë do të ishte vetëm 16 euro në muaj.

“Propozimi që kemi nxjerr ne ka qenë shumë i qartë. Të gjithë ata që kanë nevojë për me shtu kërkesën agregate këtë moment kanë mundësi me sistemin banka dhe me marrë kredi deri në dyshin e pagës mesatare. Shuma mujore e kthimin kish me qenë 16 euro dhe norma interesi zero. Sa është përqindja e familje në Kosovë që nuk munden me i rikthyer 16 euro në muaj. Në qoftë se ka familje që nuk kanë asnjë të ardhur, rrjedhimisht e kanë të pamundur me i rikthyer 16 euro, këto familje përtojnë shumë më shumë se me marrë kredi. Pasi këto futen në sistemin për çdo muaj i marrin ka 130 euro. Ju mundeni me marrë njëherë 900 euro, por familjet që nuk kanë të punësuar marrin çdo muaj ka 130 euro dhe nuk kanë me i kthyer asnjë cent sepse është ndihmë sociale. Do thotë nuk është ide parciale, por është ide e përgjithshme që e përshinë çdo element të shoqërisë. Është pak zhgënjyese se si njerëz të nivelet të Shpend Ahmetit me zero minuta analizim dalin dhe japin kundër recetë”, u shpreh ai.