Bordi i AKP-së mbi 2000 euro për një mbledhje
Kryetari dhe anëtarët e Bordit në Agjencinë Kosovare të Privatizimit (AKP) vetëm për një mbledhje marrin më shumë se 2000 euro në muaj. Gjatë vitit që lamë pas për 17 mbledhje të mbajtura kryetari i Bordit të AKP-së ka marrë më shumë se 38 mijë euro, ndërsa anëtarët e Bordit më shumë se 34 mijë euro.
Petrit Gashi, kryesues i Bordit në Agjencinë Kosovare të Privatizimit (AKP), për vetëm një mbledhje gjatë vitit që lamë pas ka marrë hiç më pak se 2276 euro, derisa anëtarët e Bordit të kësaj Agjencie të pavarur kanë marrë 2000 euro.
Duke u bazuar në të dhënat e deklaruara në Agjencinë Kundër Korrupsioni (AKK) shihet se mëditja e kryesuesit të Bordit është gati edhe një herë më e lartë sesa paga mujore e kryeministrit të Kosovës Ramush Haradinaj, e cila është rreth 1500 euro.
Në formularët e AKK-së kryesuesi i Bordit Petrit Gashi ka vetëdeklaruar se brenda një viti nga AKP-ja merr hiç më pak se 38.700 euro, derisa anëtari i Bordit në këtë institucion Bajram Zejnullahu ka deklaruar se të hyrat e tij vjetore nga AKP-ja janë 34.200 euro.
Gazeta “Zëri” përmes një shkrese ka kërkuar nga AKP-ja të dhëna të detajizuara për pagesën e kryesuesit dhe të anëtarëve të Bordit, por këta kanë dhënë informacione të përgjithshme.
Zëdhënësi i AKP-së Ylli Kaloshi ka treguar se Bordi i Drejtorëve ka dy anëtarë nga tetë sa ka pasur.
“Bordi i Drejtorëve i AKP-së aktualisht i ka me mandat dy anëtarë nga tetë sa ka në përbërje sipas Ligjit të AKP-së. Me mandat ligjor aktualisht janë kryesuesi i Bordit të Drejtorëve Petrit Gashi dhe zëvendëskryesuesi i Bordit Bajram Zejnullahu. Këta kanë mandat deri më datën 16 dhjetor 2018”, thuhet në përgjigjen me shkrim të AKP-së.
