Çanta origjinale “Hermes” e Jane Birkin-it shitet për 8.6 milionë euro

E gërvishtur dhe e njollosur, çanta Birkin prej lëkure të zezë u shit për 8.6 milionë euro (10 milionë dollarë), me tarifa, duke u bërë çanta më e shtrenjtë e shitur ndonjëherë në ankand.

Çanta e parë Birkin e krijuar ndonjëherë nga Hermes, u krijua për aktoren dhe këngëtaren britanike Jane Birkin. Ikona e stilit frankofone e përdori atë pothuajse çdo ditë nga viti 1985 deri në vitin 1994, përpara se të bëhej simboli përfundimtar i luksit. Të enjten, çanta e rrallë u shit nga shtëpia e ankandeve Sotheby’s në një shitje online të modës së shquar luksoze, duke përfshirë dizajne nga Alexander McQueen dhe Christian Dior, shkruan CNN.

Shtëpia e ankandeve nuk pranoi të jepte një vlerësim të Birkin origjinal për CNN përpara shitjes, por ofertat paraprake kishin thyer tashmë rekorde në 1 milion euro. Gjatë një transmetimi të drejtpërdrejtë të shitjes, dëgjoheshin gulçime ndërsa ofertat rriteshin gjithnjë e më shumë. Lufta 10-minutëshe e ofertave midis nëntë koleksionistëve përfundoi në fund me fitoren e një koleksionisti privat nga Japonia, sipas një njoftimi për shtyp të Sotheby’s.