Daçiq: Gana, shteti i 16-të që tërhoqi njohjen e Kosovës

Ministri i Jashtëm i Serbisë, Ivica Daçiq, ka deklaruar sot se Gana është shteti i 16-të që ka tërhequr njohjen e Kosovës.

Daçiqi tha se një shënim ka arritur në Serbi nga Ministria e Jashtme e Ganës gjatë fundjavës, duke deklaruar se po tërheqin njohjen e shtetit të Kosovës, transmeton Indeksonline.

“Vendi më i madh që ka tërhequr njohjen e Kosovës deri tani, me një popullsi prej 30 milionë banorësh, trefishi i madhësisë së Serbisë. Gana është gjithashtu një mike tradicionale e ish- Jugosllavisë”, ka thënë Daçiqi.

Më pas ai ka shtuar se bisedimet me Ganën janë zhvilluar për një kohë të gjatë, në të gjitha nivelet.

“Gana është një vend serioz dhe shënimi që ajo dërgoi është më i mirë se sa kemi menduar. Në fjalinë e dytë thuhet se Gana ka marrë vendimin për tërheqjen e njohjes së Kosovës dhe se vendimi i mëparshëm i Qeverisë për njohjen e Kosovës është i gabuar dhe parasheh shkeljen e Kartës së Helsinkit dhe Rezolutës 1244”, shtoi Daçiqi.

Daçiqi ritheksoi se Gana është ndër shtetet kryesore të Afrikës./Indeksonline/