Dënohen me 25 vjet burgim tre persona nga Ferizaj, kishin goditur me thikë për vdekje një person, më 2018

Gjykata Themelore në Ferizaj, ka shpallur aktgjykimin dënues ndaj tre personave, të cilët në vitin 2018 kishin vrarë me thikë e mjete të tjera të ndjerin E.I.

D.SH. është dënuar me 20 vjet burgim, ndërsa ndërsa të pandehurit M.M dhe A.A për veprën penale të kryer secili veç e veç pjesëmarrje në rrahje, u shqiptoi secilit veç e veç dënime me burgim në kohëzgjatje nga dy (2) vjet e gjashtë (6) muaj..

Njoftimi i gjykatës:

Ndaj të pandehurit D.SH. shtetas i Republikës së Kosovës,  i cili sipas aktakuzës së Prokurorisë Themelore në Ferizaj, akuzohet për veprën penale: Vrasje e rëndë nga neni 179 paragrafi 1 nën paragrafi 1.8 të Kodit Penal të Republikës së Kosovës (KPRK) dhe të pandehurit  M.M. dhe A.A. për shkak të veprës penale të kryer secili veç e veç, pjesëmarrje në rrahje nga neni 190 paragrafi 1 të KPRK-së.

Kryetari i trupit gjykues i Departamentit për krime të rënda – Sahit Krasniqi, pas mbajtjes së shqyrtimit gjyqësor dëgjimit të palëve, administrimit të të gjitha provave, fjalëve përfundimtare, të pandehurin D.SH. e shpalli fajtor për veprën penale vrasje e rëndë nga neni 179 paragrafi 1 nën paragrafi 1.8 të KPRK-së dhe i shqiptoi dënim burgim në kohëzgjatje prej  njëzet (20) vjetësh, ndërsa të pandehurit M.M. dhe A.A. për veprën penale të kryer secili veç e veç pjesëmarrje në rrahje, u shqiptoi secilit veç e veç dënime me burgim në kohëzgjatje prej nga dy (2) vjet e gjashtë (6) muaj..

I pandehuri D.SH. akuzohet se më 15 qershor 2018 në një kafene në rrugën “Dëshmorët e Kombit” në Ferizaj, me dashje direkte, nga hakmarrja e paskrupullt, ka privuar nga jeta E.I., në atë mënyrë që për shkak të një mosmarrëveshjeje të para një viti, në të cilën tani i ndjeri e kishte goditur me thikë tani të pandehurin, duke i shkaktuar lëndime të rënda trupore, i pandehuri në shenjë hakmarrjeje ditën kritike, kishte shkuar së bashku me të pandehurit M.M. dhe A.A. në kafenenë e përmendur, ku ishte duke punuar tani i ndjeri, me ç’rast  e ka nxjerrë thikën me të cilën në mënyrë tinëzare nga hakmarrja e paskrupullt e godet viktimën në pjesën e gjoksit, e cila depërton deri në zemër, kurse i pandehuri M.M. e godet me shishe të qelqit disa herë si edhe i pandehuri A.A. e godet me shqelma, kështu që i ndjeri rrëzohet, kurse i pandehuri D.SH. e godet edhe tetë (8) herë me thikë në pjesën e shpinës dhe një herë në pjesën e qafës, nga të cilat goditje pëson lëndime të rënda trupore, gjakderdhje të brendshme dhe të jashtme, si pasojë e të cilave pasi dërgohet në QKUK në Prishtinë, ndërron jetë.

Kundër këtij aktgjykimi, palët kanë të drejtë ankese në afat prej pesëmbëdhjetë (15) ditësh nga dita e pranimit të aktgjykimit në formë të shkruar. Ankesa i drejtohet Gjykatës së Apelit në Prishtinë, përmes Gjykatës Themelore të Ferizajt.