Dënohet me vdekje indiani që dogji të gjallë gruan, për shkak të ngjyrës së lëkurës

Një gjykatë në Indi ka dënuar me vdekje një burrë, i cili dogji të gjallë gruan e tij.

Kishandas e dogji gruan e tij, Lakshmi, për shkak të ngjyrës së errët të lëkurës së saj.

Gjykatësi i qarkut, Rahul Choudhary, në qytetin verior të Udaipurit, shpjegoi dënimin me vdekje duke thënë se vrasja binte në kategorinë e “më të rrallave të të rrallave” dhe ishte “një krim kundër njerëzimit”.

Avokati i Kishandas i tha BBC-së se klienti i tij ishte i pafajshëm dhe se ata do të apelonin kundër urdhrit.

Vrasja e Lakshmit tetë vjet më parë dhe vendimi i dhënë në fundjavë, kanë bërë bujë në një vend ku obsesioni publik me ngjyrën e lëkurës është i dokumentuar.

Lakshmi tha se burri i saj shpesh e quante “kali” ose me lëkurë të errët dhe trupi i saj e turpëronte, që nga martesa e tyre në vitin 2016.

Natën që ajo vdiq, Kishandas kishte sjellë një shishe plastike me një lëng ngjyrë kafe, që tha se ishte një ilaç për ta bërë lëkurën e gruas më të çelët.

Sipas deklaratave, ai e aplikoi lëngun në trupin e saj dhe kur ajo u ankua se kishte erë acidi, ai i vuri flakën me një shkop. Kur trupi i saj filloi të digjej, ai derdhi pjesën tjetër të lëngut mbi të dhe iku me vrap.

Prindërit dhe motra e Kishandas e çuan atë në spital ku ajo më vonë vdiq.

Prokurori publik, Dinesh Paliwal, e përshkroi urdhrin si “historik” dhe i tha BBC-së se shpreson që kjo do të shërbejë si “një mësim për të tjerët në shoqëri”.