Deputeti shqiptar në Serbi: Jeni shtet i papërfunduar, nacionalizmi juaj e ka ndryshuar vetëm formën

Shefi i Grupit të deputetëve “Lugina e bashkuar” në Kuvendin e Serbisë, shqiptar Shaip Kamberi, ka thënë se Serbia është shtet i papërfunduar. Mediat serbe bëjnë me dije se Kamberi ka thënë se e ardhmja e Serbisë nuk është zgjidhur ende dhe se këtu pengohet nga aspiratat territoriale.

“Për shkak të aspiratave territoriale që vazhdojnë të jenë të fuqishme, Serbia nuk është në gjendje ta kryejë integrimin e vet të brendshëm”, është shprehur ai.

Në Ditën Ndërkombëtare të të Drejtave të Njeriut, Kamberi ka theksuar në organin më të lartë ligjvënës në shtetin serb se nacionalizmi ekstrem që ka dominuar (në Serbi) gjatë viteve ’90-të, sipas tij në fakt e ka ndryshuar vetëm formën. Ndaj fjalës së Kamberit ka reaguar shefi i Grupit parlamentar të Partisë Socialiste të Serbisë, Gjorgje Miliçeviq, i cili e ka pyetur atë nëse ndonjë serb në cilindo territor dhe në cilindo parlament tjetër do të mund të fliste ashtu siç flet Shaip Kamberi në Kuvendin e Serbisë.

“Natyrisht se nuk do të mundej. Dhe kjo flet për respektimin e pakicave kombëtare këtu”, ka thënë Miliçeviq.

Ndërsa Kamberi vazhdoi duke theksuar se Qeveria e Serbisë nuk ka bërë asgjë për të përmirësuar të drejtat njerëzore e të pakicave.

“Tridhjetë vjet nga rënia e sistemit njëpartiak, Serbia është larg nga ndërtimi i republikës moderne, qytetare, demokratike”, është shprehur Kamberi.

Edhe për këtë, Kamberit i ka replikuar deputeti serb.

“Kosova e ashtuquajtur dhe Serbia e fuqizuar nuk janë njësoj. Serbia gjeopolitikisht është shumë më e rëndësishme për SHBA-në dhe kjo është ajo që i shqetëson protagonistët e pavarësisë së Kosovës”, tha Miliçeviq.e.su./abcnews.al