Dhjetë persona të vdekur nga të shtënat në një shkollë, në Kanada
Nëntë persona janë vrarë dhe dhjetëra të tjerë janë plagosur pasi një sulmues hapi zjarr në një shkollë në Kanadanë Perëndimore, në një nga të shtënat masive më vdekjeprurëse në historinë e vendit. I dyshuari u gjet më vonë i vdekur nga ajo që mendohet të jetë një lëndim i vetëshkaktuar.
Policia gjeti gjashtë të vdekur brenda shkollës së mesme në qytetin e largët Tumbler Ridge në British Columbia, ndërsa dy trupa të tjerë u gjetën në një banesë që besohet të jetë e lidhur me incidentin. Një person tjetër vdiq gjatë rrugës për në spital, tha Policia Mbretërore Kanadeze e Kalërimit (RCMP).
I dyshuari për të shtënat u gjet i vdekur në shkollë, tha policia, duke shtuar se nuk besonte se kishte të dyshuar të tjerë ose kërcënim të vazhdueshëm për publikun, transmeton “Guardian”-i.
Më shumë se dy duzina njerëz janë shtruar në spital – dy me lëndime kërcënuese për jetën – në atë që kryeministri i British Columbia, David Eby, e quajti një “tragjedi të paimagjinueshme”.
Një alarm policor për të shtëna aktive, i dërguar njerëzve në zonë, e përshkroi të dyshuarën si “femër me fustan dhe flokë ngjyrë kafeje”. Kapiteni i policisë Ken Floyd më vonë konfirmoi në një konferencë për shtyp se i dyshuari i përshkruar në alarm ishte i njëjti person i gjetur i vdekur në shkollë.
Policia nuk tha se sa nga viktimat ishin të mitur.
Shkolla e mesme Tumbler Ridge ka 160 nxënës në klasat 7 deri në 12, afërsisht të moshës 12 deri në 18 vjeç, sipas faqes së saj të Internetit. Shkolla do të jetë e mbyllur për pjesën tjetër të javës dhe këshillimi do t’u vihet në dispozicion atyre që kanë nevojë, thanë zyrtarët e shkollës.
