Dhoma e Përfaqësuesve voton për publikimin e dosjeve të Epstein

Dhoma e Përfaqësuesve në SHBA ka miratuar me shumicë dërrmuese një projektligj dypartiak për të detyruar Departamentin e Drejtësisë të publikojë të gjitha dosjet e çështjeve të lidhura me Jeffrey Epstein.

Sipas CNN-it, kjo është një kthesë dramatike, pas muajsh grindjesh të brendshme republikane.

Dhoma e Përfaqësuesve votoi 427-1 për të çuar përpara masën, me përfaqësuesin republikan Clay Higgins nga Luiziana të vetmin anëtar që votoi kundër saj.

Masa tani i drejtohet Senatit, ku udhëheqësit republikanë duhet të vendosin shpejt nëse do ta dërgojnë atë në tavolinën e presidentit Donald Trump.

Presidenti ka thënë se do ta nënshkruajë projektligjin nëse Kongresi e miraton atë, pas një ndryshimi të fortë në qëndrimin e tij.

Në një konferencë për shtyp më parë, të mbijetuarit e abuzimit nga Epstein i kërkuan Kongresit të çonte përpara projektligjin.