Dokument: Ja sa kushtuan BMW-të e famshme të MPJ-së, u blen në vitin 2019

Janë bërë të famshme BMW-të e Ministrisë së Punëve të Jashtme që po qëndrojnë të parkuara prej sa kohësh në oborrin e kësaj ministrie.

U fol e u përfol shumë rreth këtyre veturave, u dhanë shumë opinione e çmime të pasakta, por që realiteti është krejt ndryshe.

Indeksonline ka siguruar kontratën e blerjes së veturave dhe çmimin e saktë të tyre.

50 mijë euro neto është çmimi i një veturë të blerë, gjë e cila shihet edhe në kontratën e siguruar nga Indeksonline.

Ky çmim është dukshëm më i lirë se sa çmimi real i veturave që sillet me vlerë më të lartë në treg.

Veturat janë blerë në kohën kur Behgjet Pacolli ka qenë ministër i Punëve të Jashtme, saktësisht më 28 tetor të vitit 2019.

Blerja e BMW-ve është bërë me qëllim të transportimit të delegacioneve të huaja, pritjet dhe akomodimet e tyre. /Indeksonline/

Ministria e Punëve të Jashtme dhe Diasporës ka reaguar pas lajmeve për blerjen e tri veturave të markës BMW.

Përmes një reagimi për media MPJD, ka theksuar se procedura (e negociuar) për blerjen e tri veturave të markës BMW, ka nisur me datën 24 maj 2019, nga departamentet përgjegjëse të Ministrisë së Punëve të Jashtme dhe Diasporës.

“Ministria e Punëve të Jashtme dhe Diasporës bën këtë sqarim në lidhje me blerjen e tri veturave të markës BMW, meqë dy ditët e fundit ka pasur një tendencë të qëllimshme që të spekulohet dhe dezinformohet opinioni publik.
Asnjë nga pretendimet e plasuara në medie, qoftë për kohën e blerjes, që spekulohet se ka ndodhur gjatë pandemisë, qoftë për çmimin e blerjes, që po ashtu spekulohet për shuma astronomike, nuk qëndrojnë.

Procedura (e negociuar) për blerjen e tri veturave të markës BMW, ka nisur me datën 24 maj 2019, nga departamentet përgjegjëse të Ministrisë së Punëve të Jashtme dhe Diasporës.
Procedurat janë zhvilluar në pajtim me ligjet në fuqi, në akordancë të plotë me Ligjin e prokurimit publik, për blerje të tilla, dhe kanë nisur pas kërkesës që është shprehur nga departamentet përkatëse të Ministrisë, të cilat kanë konsideruar se pritja e delegacioneve të huaja qeveritare të cilat vizitojnë Kosovën duhet të bëhet në mënyrë
dinjitoze, pasi kjo tregon edhe përshtypjet e para dhe imazhin e vendit të ri.
Kontrata për blerjen e tyre është firmosur me datën 14 qershor të vitit 2019 ndërmjet BMW AG Munchen dhe Ambasadës së Republikës së Kosovës në Berlin, kur MPJD drejtohej nga ish ministri Behgjet Pacolli.
Veturat janë sjellë në Kosovë në dhjetor të vitit 2019, kanë qenë gjithmonë brenda objekteve të Ministrisë së Punëve të Jashtme dhe Diasporës dhe për përdorimin e tyre është vendosur varësisht nga nevoja.

Tri veturat, tashmë në pronësi të MPJD janë blerë me çmim të arsyeshëm të tregut, me një zbritje, e cila ka qenë edhe arsyeja e zgjedhjes së ministrisë për t’i blerë këto vetura.

Për dijenin tuaj, kompanitë e markave të njohura të veturave, siç është BMW, ofrojnë gjithmonë çmime jashtë konkurrencës për misionet diplomatike, pasi këtë e konsiderojnë edhe si marketing dhe imazh të mirë për kompaninë.
Dera e Ministrisë së Punëve të Jashtme dhe Diasporës është gjithmonë e hapur për medie dhe çfardolloj informacioni që kërkohet prej saj, e i cili mund të ndahet me publikun”, thuhet në reagim.