Drejtori i Thesarit thotë se e ka izoluar veten, vjedhjen e 2 milionëve e quan “akt individual”

Drejtori i Thesarit, Ahmet Ismaili, përmes një letre publike ka thënë se vjedhja që ka ndodhur në institucionin që drejton është krejtësisht veprim individual.

Ai tha se prej 16 tetorit është në izolim, pasi ka rezultuar pozitiv me COVIDIN-19.

“Veprimi që ka ndodhur është krejtësisht individual, duke tejkaluar autorizimet ligjore, duke ndërmarrë veprime të palejuara, duke krijuar përdorues false në sistem dhe duke thyer-resetuar fjalëkalime të zyrtarëve përgjegjës të ministrisë, nga e cila janë marre mjetet. Pra, ka përdorur qasjet nga sistemi për të bërë krim, i cili ka pasur qëllim mashtrimin përmes manipulimit dhe thyerjes nga brenda të sistemeve, që bie në domenin e krimit kibernetik po ashtu. Ky veprim është kryer pa bashkëpunim dhe pa asnjë aprovim nga eproret”, ka thënë Ismaili në letër.

Për këtë vjedhje që u zbulua të mërkurën, u arrestua zyrtari i Thesarit Labinot Gruda, ndërkohë pronarët e firmës ku përfunduan mjetet, mbi 2 milionë euro, janë në arrati.