Dy të arrestuar për shpërthimin që kishte ndodhur në afërsi të një lokali në Mitrovicë

Dy persona janë arrestuar pas një shperthimi që ka ndodhur kohë më parë në sheshin “Adem Jashari ”, afër një lokali në Mitrovicë. Shpërthimi ka ndodhur me datë 09.06.2023, rreth orës 03:25.

Policia njofton se personat e arrestuar dyshohen  për veprën penale ,,Shkaktim i rrezikut të përgjithshëm”

Të dyshuarit: A.D., 25 vjeçar dhe G.H.,20 vjeçar, të dy shtetas të Republikës së Kosovës, janë intervistuar në cilësinë e të dyshuarve dhe pas intervistimit me Aktvendim të prokurorit, u është caktuar masa e ndalimit policor për 48 orë.

Policia bënë të ditur se në bazë hetimit dhe ekzaminimit të vendit të ngjarjes, dyshohej se mjeti shpërthyes kishte qenë granatë dore.

“ Shpërthimi kishte ndodhur në afërsi të derës së hyrjes së lokalit dhe si pasojë e shpërthimit kishte pasur dëme materiale në atë lokal e gjithashtu ishin dëmtuar xhamat edhe të dy lokaleve të tjera. Në lidhje me rastin ishte njoftuar prokuroi dhe sipas udhëzimeve të tij ishte iniciuar rasti për veprën penale ,,Shkaktim i rrezikut të përgjithshëm””, thuhet në njoftimin e  policisë.

Hetuesit e Sektorit Rajonal të Hetimeve të DRP-Mitrovicë Jugu kishin zhvilluar hetime intensive disa mujore në lidhje me këtë rast dhe kishin arritur të siguronin prova materiale të rëndësishme për identifikimin e personave të dyshuar.

“Provat i ishin prezantuar prokurorit dhe pasi ishte siguruar Urdhëresa për kontroll nga ana e Gjykatës Themelore në Mitrovicë, hetuesit rajonal sot me datë 23.08.2023, kanë realizuar kontrollin në një lokacion dhe kanë gjetur prova të reja të cilat janë sekuestruar. Pas kontrollit, në bazë të dyshimit të arsyeshëm janë arrestuar dy persona të dyshuar për veprën penale në fjalë”, thuhet në njoftim.