Dyshohet se ishte ‘’fantazma’’, akuzohen policët se e lanë të largohej nga vendi i ngjarjes në masakrën e Shkodrës

Agjencia e Mbikëqyrjes Policore ka referuar materialet në Prokurorinë e Shkodrës ku akuzon efektivët e policisë së Shkodrës për shpërdorim detyre në lidhje me masakrën me 4 viktima në Dobraç.

Ata akuzohen për shpërdorim detyre.

AMP-ja ka dyshime të forta se efektivët nuk kanë kryer detyrën, duke lënë që të ikte nga vendngjarja personin e tretë që dyshohet se ishte në makinën e Hamza Licit dhe Arlind Bushatit.

Tashmë pritet që organi i akuzës të thellojë hetimet në lidhje me grupin e efektivëve që ishin në vendngjarje. Ende mbetet mister personi që del në video, ndërkohë që dyshohet se pikërisht ky person është Ibrahim Lici, vëllai i Hamza Licit i njohur me nofkën ‘’fantazma’’, raporton A2CNN-i.

Ka dyshime se Ibrahim Lici të jetë lënë nga efektivët që të largohet nga vendi i ngjarjes, ndërkohë që për autoritetet 32-vjeçari është një nga personat më të kërkuar për krime të rënda./Indeksonline/