Ebola kalon kufirin e epiqendrës duke kërcënuar në nivel global

Autoritetet e Ugandës kanë konfirmuar një infeksion te dy pacientë të tjerë që janë gjithashtu nën trajtim, dhe zyrtarët po konsiderojnë shpalljen e një kërcënimi global, raporton Guardian.

Një djalë pesëvjeçar, rasti i parë i konfirmuar i ebolës jashtë Republikës Demokratike të Kongos gjatë epidemisë së tanishme, vdiq të martën mbrëma në Ugandë.

Sipas autoriteteve të Ugandës, vëllai i tij trevjeçar dhe gjyshja 50-vjeçare po trajtohen gjithashtu. Ata ishin të izoluar në një spital afër kufirit me Kongon.

Organizata Botërore e Shëndetësisë ka vënë një komitet të posaçëm për të këshilluar – nëse është e nevojshme të shpallë një kërcënim global shëndetësor pasi zyrtarët konfirmuan se epidemia ebola në DR Kongo është përhapur përtej kufijve të vendit.

Epidemia më e re deri më tash ka marrë jetën e 1400 personave, transmeton KosovaPress.

OBSH paralajmëroi se ekziston një rrezik shumë i madh për përhapjen e sëmundjeve në nivel rajonal. Epidemia ndikon në krahinat verilindore të Kongos, ku kufijtë janë me Ugandën, Ruandën dhe Sudanin e Jugut.