Subvecione për foshnjat e porsalindura, pritet të japë edhe Podujeva

Një numër i vogël i komunave në vendin tonë ofrojnë subvencione për foshnjat e porsalindura.

Edhe Komuna e Podujevës, pritet të ofrojë mbështetje të ngjashme përgjatë vitit 2021.

Në bisedë për IndeksOnlinen, nënkryetari i Komunës së Podujevës, Nexhmi Rudari, ka thënë  se për një gjë të tillë është menduar, porse nuk qenë rrethanat e favorshme.

“Për këtë vit nuk kemi planifikuar asgjë, mirëpo besoj se që nga viti i ardhshëm do të ketë subvencione për foshnjat e porsalindura edhe në komunën tonë”, ka thënë ai në një bisedë për IndeksOnline.

Sipas Rudarit, lidhur me këtë çështje duhet edhe përkrahja e Kuvendit Komunal, si edhe ndihma në buxhet.

“Ne e kemi paraparë që nga viti i ardhshëm të kontribuojmë edhe në ketë drejtim, por fillimisht duhet ta shqyrtojmë si mundësi, të miratohet nga Kuvendi. Por, për një gjë e tillë na duhet ndihmë edhe në buxhet”, ka shtuar ai.

Vlen të përmendim faktin se e fundit që ka ofruar subvencione për foshnjat e porsalindura është Komuna e Kamenicës e udhëhequr nga Qëndron Kastrati, iniciativë kjo e mirëpritur mirë nga shumë qytetarë. /IndeksOnline/