13:53 / E Mërkurë, 20 Nëntor 2019

Ekskluzive: BQK-ja u mundëson përfitime milionëshe kompanive të sigurimeve, nga xhepi i qytetarëve

Banka Qendrore e Kosovës ka vendosur që nga muaji nëntor të këtij viti t’i rrisë tarifat për sigurimin e veturave për 26,6 % . Këtë rritje BQK-ja e arsyeton me rritjen e inflacionit të kompanive të sigurimit e cila ka ardhur duke u rritur nëpër ndë vite që sipas kompanive të sigurimeve ka ndodhur për shkak të rritjes së dëmeve në aksidente.

Por në disa tabela  të siguruara nga  Indeksonline arsyetimi për inflacionin të kompanive të sigurime bie poshtë pasi që siç shihet në këto tabela kompanitë e sigurimeve po vazhdojnë të operojnë me fitime mesatare  rreth 30 %, që i bie se ato fitojnë dhjetra miliona euro në vit.

Por nëse krahasojmë tabelat me vitet e kaluar, sidomos ato të pasluftës shohim që vitet e mëparshëm kompanitë e sigurimeve kanë fituar shuma marramendëse në krahasim me dëmet që ua kanë kompensuar pronarëve të automjeteve të aksidentuara.

Nga ajo që shihet në bazë të tabelës është se kompanitë e sigurimeve fitimin më të madh e kanë nxjerrë nga polisat kufitare, duke fituar miliona euro nga sigurimet që kanë bërë kryesisht mërgimtarët tanë për automjetet e tyre. Por me gjithë këto fitimeve, Banka Qëndrore ka vendosur t’ua miratojë kompanive kërkesën për rritjen e sigurimeve të automjeteve në shifrën prej 26.6%  edhe pse këto kompani kishin kërkuar që të kishte rritje 35%.

E, marrë si tërësi që nga paslufta pra për 18 vjet me radhë  kompanitë e sigurimeve të automjeteve kanë arkëtuar rreth 900 milionë euro nga qytetarët e Kosovës, ndërsa shuma e  dëmeve të kompensuars për aksidente është rreth 308 milionë euro  pra rreth 579 milionë euro kanë pasur të hyra.

Nga kjo shifër si shpenzime administrative janë 270 milionë euro, ndërsa fitimet për kompanitë e sigurimeve janë 309 milionë euro, që nga paslufta. Me gjithë këto fitime nga kompanitë e sigurimeve  Banka Qendrore e Kosovës, e cila udhëhiqet nga guvernatori Fehmi Mehmeti, ka lejuar që të rriteshin edhe për 26.6% tarifat e sigurimeve për automjete, duke ua fryrë edhe më shumë  kontot këtyre kompanive me para nga xhepi i varfër i qytetarëve të Kosovës.

Mirëpo kjo gjë nuk është mirëpritur në opinionin publik. Madje për këtë çështje të premten do të mbahet një protestë nga qytetarët përpara BQK-së për t’i kundërshtuar këto tarifa.

Edhe Këshilli për Mbrojtjen e të Drejtave të Njeriut ka reaguar përmes një komunikate ku e ka cilësuar këtë si një plaçkë që po u bëhet qytetarëve të Kosovës.

“KMDLNJ-j, e bën përgjegjës kryesor Bankën Qendrore të Kosovës, për marrjen e vendimit që t’i rishikon tarifat për sigurimin e veturave. Që nga përfundimi i luftës, kompanitë e sigurimeve në Kosovë kanë caktuar tarifat e sigurimeve, duke pasur parasysh interesin dhe përfitimet e atyre që kanë drejtuar kompanitë, e të cilët kanë qenë instrument ekzekutiv i politikanëve të kriminalizuar të cilët kanë menaxhuar këtë strukturë përmes familjarëve të tyre apo ndikimit politik. Për vite të tëra, vazhdon edhe tani, që bashkatdhetarët nga diaspora janë detyruar të paguajnë “haraçin” gjatë hyrjeve në Kosovë me arsyetimin se, meqë Kosova nuk është pjesë e Kartonit të Gjelbër, janë të detyruar të zbatojnë këtë pagesë krejtësisht diskriminuese e që nuk bëhet në vendet e tjera”, thekson KMDLNJ-ja. /Indeksonline/