Emisari i ri i BE-së për dialogun nesër në Kosovë, takohet me Osmanin e Kurtin

Emisari i ri i Bashkimit Evropian për Kosovën, Peter Sorensen, do të zhvillojë nesër një vizitë zyrtare në Prishtinë, ku do të takohet me krerët më të lartë institucionalë të vendit.

Sipas agjendës zyrtare të Presidencës, Sorensen do të pritet nga presidentja e Kosovës, Vjosa Osmani, në një takim që pritet të fillojë në orën 09:45.

Gjatë këtij takimi, pritet të diskutohen çështje kyçe që lidhen me marrëdhëniet ndërmjet Kosovës dhe Bashkimit Evropian, përfshirë procesin e integrimit evropian, zhvillimet e fundit politike dhe situatën e sigurisë në vend.

Sipas agjendës zyrtare, Sorensen do të pritet nga kryeministri i Kosovës, Albin Kurti, në një takim që pritet të fillojë në orën 10:30.

Në fokus të diskutimeve do të jetë dialogu Kosovë-Serbi, sfidat e zbatimit të marrëveshjeve të arritura deri tani dhe perspektiva e integrimeve evropiane për Kosovën.

Kjo është vizita e parë e Peter Sorensen në Kosovë që nga emërimi i tij si përfaqësues i posaçëm i BE-së.

Ai vjen në një kohë kur tensionet në rajon dhe dinamika e dialogut me Serbinë mbeten çështje të ndjeshme në raportet ndërkombëtare.

Për këtë arsye, pritet që vizita e tij të shoqërohet me deklarata dhe mesazhe të rëndësishme në lidhje me angazhimin e BE-së në proceset politike dhe stabilitetin në Ballkanin Perëndimor.