Faton Peci: Rezultati i sotëm i votave nga Mërgata është kontribut në etapën e katërt
Pas përfundimit të numërimit të votave të diasporës ka reaguar edhe krahu i djathtë i Vjosa Osmanit, deputeti i dalë nga zgjedhjet e 14 shkurtit, Faton Peci.
Ai në një postim në Facebook, ka lavdëruar mundin e diasporës ndër gjenerata për sakrificën që kanë bërë për Kosovën.
Postimi i plotë i Faton Pecit:
Rezultati i sotëm i votave nga Mërgata është kontribut në etapën e katërt, atë të shtetndërtimit dhe dashurisë ndaj vendit.
Ata janë qytetarë tanë, të cilët u larguan me lot në sy, me mall për vendlindjen dhe të vetëdijshëm për sakrificën që duhet bërë.
Ata e mbajtën Kosovën gjallë, duke e financuar sistemin paralel për dhjetë vite. Njësoj siç i mbajtën gjallë familjet e tyre.
Janë ata që e financuan dhe morën pjesë aktive në luftën e popullit të Kosovës për çlirim.
Ata rindërtuan Kosovën e pasluftës, nga dëmet e regjimit gjenocidal të Millosheviqit.
Mërgata me votën e 14 shkurtit u bë shtytëse kruciale për t’i dhënë Kosovës kahun e nevojshëm dhe të duhur për periudhën që e kemi përpara. Kontribuan njësoj sikurse në tri etapa të mëhershme të rëndësishme përgjatë historisë.
Mërgata është katalizatori i shteti tonë, ndaj jo që do t’u jemi mirënjohës përherë, por do t’i bëjmë pjesë të vendimmarrjes për një të ardhme që e duam të gjithë!
Faleminderit Mërgatë❤