Filmi italian në Kosovë: Nga 23 deri më 27 qershor, më të mirët e kinemasë bashkëkohore italiane në edicionin e tetë të “fare cinema”

Me rastin e edicionit të tetë të “Fare Cinema” – java ndërkombëtare e dedikuar promovimit të kinemasë dhe industrisë italiane të filmit, e organizuar nga Ministria e Punëve të Jashtme dhe Bashkëpunimit Ndërkombëtar të Italisë (MAECI) – Ambasada e Italisë në Prishtinë, në bashkëpunim me Institutin Italian të Kulturës në Tiranë dhe DokuFest-in, ka sjellë në Kosovë programin Italian Screens, me synimin për të promovuar filmat më të mirë të kinemasë bashkëkohore italiane. Ky program mbështetet nga MAECI, Cinecittà dhe Drejtoria e Përgjithshme për Kinemanë dhe Audiovizualin e Ministrisë Italiane të Kulturës.

Programi – që dëshmon përkushtimin e Ambasadës për të thelluar më tej lidhjet kulturore mes Italisë dhe Kosovës – sjell një seri shfaqjesh filmash, falas dhe të hapur për publikun, në Teatrin Oda në Prishtinë dhe në DokuKino në Prizren. Për herë të parë në Kosovë do të prezantohen pesë filma italianë bashkëkohorë, të cilët janë vlerësuar gjerësisht nga kritika dhe kanë fituar çmime të rëndësishme. Të gjithë filmat do të shfaqen në versionin origjinal, në gjuhën italiane, me titra anglisht.

Ambasadori i Italisë në Prishtinë, Maurizio Antonini, u shpreh: “Jemi shumë të kënaqur që po prezantojmë një program që vlerëson talentin e kinemasë bashkëkohore italiane, duke i dhënë hapësirë të veçantë zërave të rinj dhe perspektivës femërore. Prania e dy regjisoreve gra, Delpero dhe Vicario, si dhe roli qendror i protagonisteve në filmin Diamanti, nuk është rastësi – është një mënyrë për të vënë në pah gjallërinë dhe thellësinë e shikimit femëror në rrëfimin e shoqërisë sonë.”

Kalendari i shfaqjes së filmave:

• E hënë, 23 qershor, Teatri Oda, Prishtinë: “Vermiglio” nga Maura Delpero (2024). Film i përzgjedhur për të përfaqësuar Italinë në Oscar 2025 në kategorinë “Filmi më i mirë ndërkombëtar”. Fitues i Luanit të Argjendtë – Çmimi i Madh i Jurisë në Festivalin e Venecias 2024 dhe i 7 çmimeve David di Donatello, përfshirë Filmi më i Mirë, Regjia, Skenari dhe Kinematografia.
  “Vermiglio” është një rrëfim i fuqishëm që ndërthur kujtesën dhe identitetin, duke na udhëhequr nëpër rrudhat e Historisë dhe plagët e së kaluarës.

• E martë, 24 qershor, DokuKino, Prizren: “Diamanti” nga Ferzan Ozpetek (2024). Fitues i Çmimit Nastro d’Argento “Filmi i Vitit” 2025 dhe i çmimit David i Publikut si filmi italian më i shikuar në kinema gjatë vitit 2024.
  “Diamanti” është një portret sentimental i hollë që ndërthur dëshirën, ambicien dhe afirmimin e identitetit, duke u shfaqur si një deklaratë dashurie dhe respekti për aftësinë dhe vendosmërinë e grave për t’u bashkuar dhe vepruar së bashku.

• E mërkurë, 25 qershor, DokuKino, Prizren: “Gloria!” nga Margherita Vicario (2024).
  Vepra e parë e regjisores Vicario fitoi çmimet David di Donatello 2025 për Regjisorja Debutuese më e Mirë dhe Kënga Origjinale më e Mirë.
  “Gloria!” është një himn ndaj lirisë krijuese, mes muzikës baroke dhe rebelimit rinor. Një lavdi për fuqinë e zërit femëror në një botë që përpiqet ta heshtë atë.

• E enjte, 26 qershor, Teatri Oda, Prishtinë: “Il Bambino Nascosto” nga Roberto Andò (2021). Fitues i çmimit Nastro d’Argento 2022 për Aktorin më të Mirë në Rolin Kryesor, Silvio Orlando. Një dramë prekëse mbi mbrojtjen, besimin dhe mundësinë e shpëtimit.

• E premte, 27 qershor, Teatri Oda, Prishtinë:
  “Ciao Bambino” nga Edgardo Pistone (2024). Fitues i çmimit për Veprën më të Mirë të Parë në Festivalin e Kinemasë në Romë 2024. Filmi hedh një vështrim të ndjeshëm dhe poetik mbi fëmijërinë dhe lamtumirën, duke rrëfyer me lehtësi dhe thellësi kalimin nga ajo që ishte tek ajo që do të vijë.