Flet i shumëpërfoluri Fetah Paçarizi, kandidati i PDK-së thotë se s’është pjesë e manipulimeve

Kandidati për deputet nga radhët e PDK-së, Fetah Paçarizi, ka reaguar përmes një postimi në facebook lidhur me zhvillimet e fundit gjatë procesit të rinumërimit të votave nga Komisioni Qendror i Zgjedhjeve, duke e cilësuar situatën si serioze dhe shqetësuese.

Paçarizi shpreh dyshime mbi integritetin e procesit të numërimit dhe rinumërimit të votave, duke theksuar se kjo gjendje po cenon drejtpërdrejt besimin e qytetarëve në procesin zgjedhor, shkruan IndeksOnline.

Sipas tij, për të garantuar transparencë, barazi dhe respektim të vullnetit real të qytetarëve, është i domosdoshëm rinumërimi i plotë i votave në të gjithë vendin, përfshirë edhe votat e diasporës.

“Ajo që po ndodh gjatë procesit të rinumërimit të votave nga KQZ është serioze dhe shqetësuese. Kjo situatë ngre dyshime të arsyeshme mbi integritetin e numërimit dhe rinumërimit dhe cenon drejtpërdrejt besimin e qytetarëve në procesin zgjedhor.Për këto arsye, konsideroj se është i domosdoshëm rinumërimi i plotë i votave në të gjithë vendin, përfshirë edhe votat e diasporës, në mënyrë që të garantohet transparenca, barazia dhe respektimi i vullnetit real të qytetarëve”, ka shkruar Paçarizi.

Paçarizi theksoi se nuk ka pasur asnjë ndikim në procesin zgjedhor dhe distancohet plotësisht nga çdo keqpërdorim apo manipulim që mund të jetë bërë, qoftë në emrin e tij apo në dëm të votës së lirë.

“Prokuroria e Shtetit ka detyrim ligjor dhe moral të nisë hetime të plota, të pavarura dhe profesionale. Njëkohësisht, KQZ, si organ i pavarur kushtetues, duhet të japë llogari publike dhe të ofrojë prova të qarta për ligjshmërinë dhe korrektësinë e veprimeve të saj. Pavarësia institucionale nuk nënkupton mungesë përgjegjësie.Kërkoj transparencë, hetim dhe përgjegjësi. Gabimi apo manipulimi i këtij niveli është përgjegjësi shtetërore”, ka shkruar ai./IndeksOnline/