Franca arreston dy rusë, nën dyshimet për spiunazh

Policia franceze ka arrestuar katër persona, dy prej të cilëve kanë shtetësi ruse, nën dyshimin për spiunazh për një fuqi të huaj.

Kështu ka deklaruar prokurori i Parisit, të mërkurën shkruan Reuters, transmeton IndeksOnline.

Zyra e prokurorit identifikoi një nga të dyshuarit si Anna N, shtetase e dyfishtë franko-ruse, e cila ka qenë nën mbikëqyrjen e agjencisë franceze të inteligjencës vendase DGSI që nga janari, me bindjen se po mblidhte informacione.

“Në veçanti, ajo dyshohej se iu ishte afruar drejtuesve të kompanive të ndryshme franceze për të marrë informacione që lidheshin me interesat ekonomike franceze”, tha prokurori në një deklaratë.

Zyra e prokurorit nuk e identifikoi vendin për të cilin dyshohet se spiunojnë katër personat.

Të tjerët u identifikuan si Vincent P dhe Bernard F, të lindur në Francë, dhe Vyacheslav P, një shtetas rus.

Sipas zyrës së prokurorit, Anna N themeloi SOS Donbass, një shoqatë me seli në Francë, e cila thotë në faqen e saj të internetit se bën fushatë për lidhje më të ngushta midis Evropës dhe Rusisë, dhe për ndërprerjen e dërgesave të armëve në Ukrainë. Ajo shpesh shfaq postera fushate në vende publike.

Ana përballet me deri në 45 vjet burg dhe 600,000 euro gjoba për akuza që variojnë nga bashkëpunimi deri te dëmtimi i vendeve të trashëgimisë historike, krimi i organizuar, spiunazhi dhe inteligjenca për një fuqi të huaj.

Të tjerët gjithashtu përballen me burgim dhe gjoba për akuza të ngjashme.