Franca ia kujton Putinit: “Nuk ke vetëm ti armë bërthamore”

Ministri i Jashtëm i Francës tha se kur presidenti rus Vladimir Putin bën kërcënime për përdorimin e armëve bërthamore duhet të kuptojë se edhe NATO gjithashtu është një aleancë bërthamore, por ai përjashtoi ndërhyrjen ushtarake të udhëhequr nga NATO për të mbrojtur Ukrainën.

I pyetur nëse kërcënimi i Putinit për “pasoja të tilla që nuk i keni parë kurrë në historinë tuaj” ishte i barabartë me kërcënimin e përdorimit të armëve bërthamore ruse në konfliktin në Ukrainë, ministri i Jashtëm Jean-Yves Le Drian tha se me të vërtetë kuptohej si i tillë, transmeton IndeksOnline.

“Po, unë mendoj se Vladimir Putin gjithashtu duhet të kuptojë se aleanca Atlantike është një aleancë bërthamore. Kjo është gjithçka që do të them për këtë,” tha Le Drian të enjten e 24 shkurtit 2022 në televizionin francez TF1.

Duke folur nga Kremlini të enjten në mëngjes, 24 shkurt 2022, teksa nisi pushtimin e Ukrainës nga ushtria ruse, Putin tha se Rusia do të përgjigjet menjëherë nëse ndonjë forcë e jashtme përpiqet të ndërhyjë në veprimet e saj.