FSK-ja po forcohet, Jashari dhe Haxhiu flasin për të ardhmen euroatlantike

Komandanti i Forcës së Sigurisë së Kosovës gjenerallejtënant Bashkim Jashari, ka pritur në një takim zyrtar u.d. të presidentes së Republikës së Kosovës, Albulena Haxhiu. Fillimisht gjeneral Jashari i uroi mirëseardhje u.d. së presidentes Haxhiu të cilën e informoi në lidhje me proceset nëpër të cilat po kalon Forca e Sigurisë së Kosovës, arritjet e saj dhe rrugën përpara.

Gjithashtu ata diskutuan për planifikimet e FSK-së, duke përfshirë fazën aktuale të planit gjithëpërfshirës të tranzicionit (PGJT), procesin e planifikimit afatgjatë të zhvillimit si dhe sfidat aktuale të Forcës.  Për më tepër u theksua rëndësia e pjesëmarrjes së FSK-së në operacione ndërkombëtare jashtë vendit, e cila e shndërron republikën tonë në një eksportues të sigurisë në konflikte të ndryshme globale. 

Në anën tjetër u.d. së presidentes Haxhiu e përgëzoi gjeneral Jasharin për arritjet e deritashme të FSK-së dhe për rezultatet e treguara në sfera dhe aktivitete të ndryshme në të cilat FSK-ja ka qenë pjesëmarrëse.

Në fund të takimit palët u pajtuan për rëndësinë e bashkëpunimit institucional dhe nevojën e zhvillimit dhe avancimit të FSK-së në forcë moderne, profesionale në rrugën drejt anëtarësimit në NATO.