Gërvalla: BE të mos pres një luftë tjetër, ta integrojë Ballkanin

Ministrja e Punëve të Jashtme dhe Diasporës, Donika Gërvalla, ka thënë se Bashkimi Evropian nuk duhet të presë një luftë tjetër në Ballkanin Perëndimor për t’i hapur rrugë integrimeve evropiane.

Në Forumin e Dubrovnikut të shtunën, ajo ka deklaruar se vendet e Ballkanit tashmë kanë dëshmuar se kontribuojnë jashtëzakonisht shumë në vlerat e përbashkëta në BE.

“Dhënia e statusit të kandidatit për Ukrainën u diskutua para fillimit të luftës dhe siç e pamë kishte shumë skeptikë që na thanë se nuk ishte e mundur dhe se nuk kishte asnjë rrugë të shkurtër. Pastaj erdhi lufta dhe u mor vendimi i duhur për të ndihmuar”.

“Është e rëndësishme që Ukraina ta fitojë këtë luftë, është mirë që ofrohet ndihma jo vetëm politike, por edhe ushtarake dhe ekonomike. Është e rëndësishme të mos presim një luftë të re në Ballkan në mënyrë që ky rajon të mund të integrohet në BE”, ka pohuar Gërvalla.

Sipas saj, rajoni ka probleme, por pesë vendet e Ballkanit u rreshtuan me vlerat evropiane, sanksionet ndaj Rusisë, duke kritikuar Serbinë se nuk e bëri këtë.

“Nuk mund të heshtim për faktin se në Ballkanin Perëndimor një nga vendet nuk ka treguar se është pjesë e vlerave të BE-së përmes solidaritetit me Ukrainën dhe kundër kësaj lufte. Kjo duhet të ndryshojë”, tha ajo, duke shtuar se nuk mund të ndryshohet me fjalë, por vetëm nëse në Serbi ka forca demokratike që janë të gatshme ta bëjnë atë pjesë të vlerave të BE-së.

Për dialogun me Serbinë, ajo tha se Kosova është e interesuar, por se problemi është se “Serbia duhet ta kuptojë realitetin”.