Gjakova mirëpret “Ekspozitën e Veturave Historike” – një festë e traditës dhe elegancës klasike

Sot, qyteti i Gjakovës u shndërrua në një muze të hapur të automobilizmit klasik, duke mirëpritur edicionin e radhës të ngjarjes tashmë tradicionale “Ekspozita e Veturave Historike”.
E organizuar nga Old Timer Club Gjakova, me përkrahjen e Komunës së Gjakovës, kjo ekspozitë solli në Parkun e Madh të qytetit dhjetëra vetura unike nga periudha të ndryshme historike, të cilat ruajnë në vete hijeshinë dhe shpirtin e një epoke të artë të automobilizmit.
Pjesëmarrës nga shumë qytete shqiptare nga Kosova, Shqipëria, Maqedonia e Veriut dhe më gjerë u bashkuan për të ndarë pasionin dhe dashurinë për veturat klasike me qytetarët e Gjakovës, duke sjellë kështu edhe më shumë jetë dhe gjallëri në qytet.
Kryetari i Komunës së Gjakovës, Ardian Gjini, përmes një postimi në rrjete sociale, e quajti këtë ekspozitë “një festë të kujtesës dhe pasionit”, duke theksuar rëndësinë e ruajtjes së trashëgimisë automobilistike dhe fuqizimit të aktiviteteve kulturore në qytet.
“Një traditë që e kthejmë çdo vit në festë për qytetarët tanë. Parku i Madh i Gjakovës sot u mbush me histori, pasion dhe art.” u shpreh Gjini./IndeksOnline/