Gjermania heq opsionin e nënshtetësisë së përshpejtuar për emigrantët
Parlamenti gjerman të mërkurën miratoi heqjen e opsionit të “nënshtetësisë së përshpejtuar” për emigrantët, duke miratuar një ligj të debatueshëm të shtyrë përpara nga aleanca konservatore e kancelarit Friedrich Merz.
Ligji i ri vendos një periudhë standarde qëndrimi prej pesë vitesh për të gjithë aplikantët për nënshtetësi, duke eliminuar mundësinë e marrjes së nënshtetësisë pas tre vjetësh për emigrantët që kishin dëshmuar integrim të jashtëzakonshëm.
Ligjvënësit nga Unioni Kristian Demokrat/Unioni Kristian Social (CDU/CSU) i kancelarit Merz, partnerët e tyre të koalicionit socialdemokratë (SPD), si dhe opozita kryesore e ekstremit të djathtë, Alternativa për Gjermaninë (AfD), votuan në favor të ligjit të ri, i cili vendos kritere më të ashpra për natyralizimin.
“Natyralizimi duhet të vijë në fund të procesit të integrimit, jo në fillim”, tha ministri i Brendshëm Alexander Dobrindt gjatë debatit përfundimtar në Bundestag.
“Pasaporta gjermane duhet të jetë një shenjë njohjeje për integrim të suksesshëm, jo një nxitje për migrim të paligjshëm”, shtoi ai.
Socialdemokratët (SPD), të cilët kishin futur opsionin e nënshtetësisë së përshpejtuar gjatë qeverisjes së mëparshme, pranuan ndryshimet si pjesë e kompromisit të nevojshëm për të formuar qeverinë e koalicionit me konservatorët CDU/CSU në fillim të këtij viti.
Zëvendëskryetarja e grupit parlamentar të SPD-së, Sonja Eichwede, mbrojti kompromisin, duke theksuar se raste të nënshtetësisë së përshpejtuar kanë qenë relativisht të pakta.
Ajo shtoi se gjatë negociatave të prillit, SPD kishte arritur të bindte CDU-në që të ruante opsionin e “dyfishtë të shtetësisë” për emigrantët, gjë që sipas saj ishte “më e rëndësishme se ruajtja e procedurës së përshpejtuar”.
Nga ana tjetër, deputetët e opozitës nga e Majta dhe të Gjelbrit e kritikuan ashpër qeverinë e koalicionit të kancelarit Merz, duke argumentuar se ndryshimet populiste në politikat e integrimit dëmtojnë procesin e integrimit dhe përfaqësojnë një dorëzim ndaj propagandës anti-emigracion të ekstremit të djathtë (AfD)./TRTBank/
