Gjilani “pushton” Superligën e Shqipërisë, ky është transferimi i radhës

Pas mbrojtësit të majtë brazilian, Jackson Ferreira, klubi kosovar i Gjilanit ka arritur marrëveshjen edhe me portierin e Luftëtarit, Shkëlzen Ruçi.

Burime të sigurta të “Panorama Sport” bëjnë të ditur se skuadra e drejtuar nga vlonjati Gentjan Mezani ka siguruar shërbimet e elbasanasit dhe pritet që ta prezantojë në orët në vijim. Ruçi ka luajtur në tri sezonet e fundit me skuadrën gjirokastrite në Superiore, por pak javë më parë prishi kontratën me konsensus.

Krahas Jacksonit dhe Ruçit, Gjilani kërkon të afrojë edhe sulmuesin Ismael Dunga, si dhe mesfushorin Albano Aleksi, të cilët mbyllën sezonin me Luftëtarin. Me klubin kosovar ka firmosur edhe mbrojtësi i djathtë, Erlis Frashëri, që ishte pjesë e Teutës. /IndeksOnline/