Glauk Konjofca befason me vizitë mësuesin e tij për 7 mars

Ish-ministri i Punëve të Jashtme të Kosovës, Glauk Konjufca së bashku me shokun e bankës së tij kanë zgjedhur që të befasojnë për 7 mars mësuesin e tyre.

Konjofca ka shkruar se mësuesi Hamdi u jepte dashuri dhe ka pasur aftësi  dhe metoda të jashtëzakonshme të dhënies së mësimit.

Postimi i plotë i Konjufcës:

Së bashku me mikun dhe shokun tim të bankës shkollore, Besnik Reçica, sot pasdite e befasuam me një vizitë mësuesin tonë të parë, Hamdi Salihun, në fshatin Kojskë të Lipjanit.

Mësuesi Hamdi ka lindur në vitin 1936. Për herë të parë e mori ditarin në dorë më 1 shtator të vitit 1953. Punoi pa u lodhur e plot pasion për arsimin për 46 vite me radhë deri kur u pensionua më 1999. Edhe baba im ka qenë nxënës i mësuesit Hamdi më 1 shtator të vitit 1958.

Unë e Besniku, së bashku me plot shokë e shoqe tjera, shkuam në klasën e tij më 1 shtator të vitit 1988. Dashuria që na e jepte mësuesi Hamdi, afërsia dhe sjellja e mirë, e po ashtu edhe metoda jashtëzakonisht efektive e dhënies së mësimit, janë të paharrueshme.

Ai ka shkruar rreth 600 vjersha për fëmijë, shumica e të cilave të botuara në gazetën Rilindja dhe në revistën për fëmijë – Pionieri. Vjershën e tij të parë e ka botuar në vitin e largët 1954. Ai shkruan edhe sot.

Në arkivin e pasur të mësuesit Hamdi mund të gjesh gjëra të çmuara. P.sh. numrin e parë të Rilindjes – ’12 Fruer 1945′. Çmimin e kishte të shkruar edhe në lekë!

Pafundësisht mirënjohës për mësuesit, arsimtarët, profesorët dhe punëtorët tanë të arsimit që e bartën mbi shpatulla shkollimin e brezave.

Urime 7 Marsi!