Goditje e rëndë për Sunderlandin, zbulohet sa do të mungojë Granit Xhaka

Sunderland ka marrë një lajm jo të mirë në një moment delikat të sezonit.

Kapiteni i skuadrës, Granit Xhaka, do të mungojë të paktën dy javë për shkak të një dëmtimi në kyçin e këmbës, ka konfirmuar trajneri Regis Le Bris.

Mesfushori shqiptar, i cili iu bashkua Sunderlandit gjatë verës nga Bayer Leverkusen në një marrëveshje që mund të arrijë vlerën deri në 20 milionë euro, kishte luajtur çdo minutë në këtë edicion të Premier League.

Ai mungoi për herë të parë në humbjen 3-1 ndaj West Ham United, duke ngritur shqetësime te stafi teknik.

Pas përfundimit të ndeshjes, Le Bris sqaroi gjendjen e kapitenit të tij: “Ai ka një dëmtim në kyçin e këmbës. I duhen të paktën dy javë për t’u rikuperuar dhe më pas do të bëjmë një vlerësim tjetër mjekësor,” deklaroi trajneri francez.

Xhaka ka qenë një nga shtyllat e Sunderlandit këtë sezon, duke u aktivizuar në të gjitha 23 ndeshjet në të gjitha kompeticionet, ku ka kontribuar me një gol dhe pesë asistime.

Gjatë sfidës ndaj West Hamit, përfaqësuesi i Zvicrës u pa gjithashtu i përfshirë në një përplasje verbale me disa tifozë vendas, teksa ishte ulur pas stolit të Sunderlandit, situatë që solli ndërprerjen e përkohshme të lojës.

Mungesa e Xhakës pritet të jetë një goditje e ndjeshme për Sunderlandin, i cili po lufton për stabilitet në mesin e tabelës së Premier League.