Grabitje, Hajnat prezantohen si policë, ia morën 300 mijë euro lokes shqiptare

Të tjera detaje dalin në dritë nga grabitja që ndodhi dje në Fushë-Milot. 3 persona, të maskuar pasi hynë në banesën e Tafë Shabanit, vodhën prej aty një shumë të madhe eurosh.

Dëshmitare e skenës së vjedhjes është bërë e zonja e shtëpisë, e cila ka treguar momentet e tmerrit që përjetoi teksa 3 persona të maskuar iu shfaqen në banesë. Në një rrëfim për gazetarin Elidon Ndreka, Hume Shabani, tha se në kasafortë ishin lekët e të gjithë fëmijëve, të cilët prej 30 vjetësh punonin si emigrantë. Ajo tha se autorët kishin hapur kasafortën me gurë freksibël.

“Ka ndenjur burri me vajzën ca kohë në Tiranë, ajo ka punuar dhe i ka futur eurot këtu me i ruajt e shkreta. Kalamajtë kanë 30 vjet andej që punojnë. Ishin 3 veta. Unë u thash si vini pa një kryetar komune apo dhe me një operativ zone. U thashë se ku e gjetët shtëpinë time?! Ishin të maskuar. Njëri prej tyre, ishte i vogël, e hoqi maskën dhe tha: “Mos u tremb!”. Por jam operuara dhe nuk shoh mirë. Ai e vuri prapë maskën. Njëri ruante që nga rruga. Kishin parë gurë freksibël. U thashë: “A jeni diversantë? Si e prekni gjënë e juaj”. Ishte ora rreth 17:00.

Plaku ishte duke pirë kafe me një bashkëfshatar. Kur e kuptova se ishin hajdutë doja të merrja policinë në telefon, por nuk më lanë. Ma morën celularin. Më thoshin: “Ku e ke djalin? Ka dalë djali nga burgu? ku ke armët? Ka i ka lënë djali armët? Më pas e kuptova. Ata ikën dhe morën të gjitha. Më pas dola poshtë dhe njoftova plakun. Plaku desh vdiq. Policia erdhi më pas. Djali është në burg (në burg në Itali). Se di për çfarë e morën. Xhevair Shabani e ka emrin djali im. Po bën gati 1 vit e gjysmë në burg”, rrëfeu e tronditur lokja.