Grenell: Do të provojmë të ndërtojmë një zonë ekonomike midis Kosovës dhe Serbisë
Emisari special i presidentit Donald Trump, Richard Grenell, në një intervistë për televizionin amerikan, Newsmax, ka folur për takimin midis Kosovës dhe Serbisë, në Washington, të shtunën e 27 qershorit dhe mundësinë e krijimit të një zone ekonomike midis dy shteteve.
Grenelli ka thënë se kur ka diskutuar me komunitetin e biznesit në Kosovë dhe Serbi kanë kërkuar zhvillim ekonomik.
“Kur fillova të diskutoja këto çështje me njerëzit e Kosovës dhe komunitetin e biznesit në Kosovë, njerëzit në Serbi dhe komunitetin e biznesit atje, çfarë ishte e qartë është se ata dëshironin zhvillim ekonomik. Ata donin vende pune për të rinjtë, ata donin shpresë”, ka thënë Grenelli.
Ai ka përmendur marrëveshjet e arritura për autostradën, hekurudhën dhe linjën ajore, duke shtuar se administrata e Trumpit, do të koncentrohet për të krijuar një zonë të vogël ekonomike midis dy shteteve.
“Çfarë ne provuam është të gjejmë menjëherë formulën se si të rrisim ekonominë. Ne bëmë një marrëveshje për linjën ajore, të parën pas 21 vjetësh, fluturimet midis Prishtinës, kryeqytet i Kosovës dhe Beogradit, kryeqytet i Serbisë. Ende nuk janë zbatuar, por ne kemi marrëveshjen, e cila do t’i hapë kufijtë e tregtisë dhe një marrëveshje të madhe kufitare për trafikun e automjeteve. Çfarë ne jemi duke provuar të bëjmë është të koncentrohemi në situatën ekonomike, për të krijuar një zonë mini-Shenzhen, zona e parë speciale ekonomike në Kinë”, ka thënë ai.
“Ne mendojmë që kjo është një ide shumë shumë e mirë, dhe mendojmë se nëse mundesh të krijosh vende pune në rajon, nëse ti mundesh të sjellësh kapitalizmin që i shtynë palët të pajtohen ekonomikisht dhe në tregti, atëherë çështjen politike do të jenë hap dytësor. Çështjen politike janë qartësisht përgjegjësi e Evropianëve”, ka shtuar Grenelli.
